Shqetësimi i ngritur nga kreu i SPAK përpara ministres së Drejtësisë ka marrë përmasa serioze pas së premtes, kur një nga anëtarët e Gjykatës së Posaçme rezultoi të ishte prekur nga COVID-19.
Kjo për faktin se zyrat provizore të SPAK ndodhen në të njëjtin ambient me ato të Gjykatës së Posaçme, ndërsa zyrat e përhershme po i nënshtrohen një rikonstruksioni të përgjithshëm.
Mbërritja e virusit në godinë ka ngjallur shqetësim te të gjithë punonjësit, ndërsa personat që kanë pasur kontakte me të infektuarin pritet t’i nënshtrohen testit.
Situata e krijuar ka vënë në pikëpyetje edhe mbarëvajtjen e punës në Gjykatën e Posaçme. A2 mësoi se mëngjesin e së hënës do të vendoset nëse gjykata do të vijojë punën normalisht, apo do të ketë pezullim të përkohshëm të veprimtarisë.
Javën e kaluar kanë pezulluar përkohësisht punën Gjykata e Apelit Durrës dhe Gjykata e Shkallës së Parë në Kavajë pasi rezultuan pozitivë me Covid-19 dy gjyqtarë dhe një punonjës.
