Pasditen e djeshme 3 eurodeputetë të Parlamentit Europian bënë një deklaratë ku kërkonin që rë miratohej pa ndryshime marrëveshja e 5 qershorit, ndërsa kërcënuan me negociatat dhe integrimin e vendit, nëse bëheshin ndryshime pa konsensusin e opozitës.
Por, çuditërish, pak orë më pas kjo deklaratë u fshi dhe nuk ekziston më në faqen online të Parlamentit Europian. Nuk dihet arsyeja pse kjo deklaratë është fshirë.
Në deklaratën e përbashkët bërë nga Kryetari i Komisionit për Punë të Jashtme David McAllister, Raportuesja për Shqipërinë, Isabel Santos dhe Kryetari i Delegacionit të Parlamentit për Shqipërinë, Manolis Kefalogiannis thanë se “Parlamenti shqiptar duhet të miratojë marrëveshjen e 5 qershorit të arritur me konsensus dhe çdo modifikim i kësaj marrëveshje i bërë pa konsensusin e të gjithë palëve do të minonte integrimin dhe thirrjen e konferencës së parë për negociatat e anëtarësimit të vendit në BE”.
Lexoni deklaratën e plotë që është fshirë nga faqa online e Parlamentit Europian.
“Ne presim që shumica parlamentare të miratojë ndryshimet e nevojshme pa dëmtuar konsensusin e arritur midis Qeverisë dhe Opozitës më 5 qershor. Çdo modifikim i Marrëveshjes pa arritur një konsensus me të gjitha partitë politike mund të rrezikojë thirrjen e konferencës së parë për negociatat e anëtarësimit, dhe për këtë arsye të ngadalësojë procesin e integrimit evropian. Çdo vend është i lirë të vendosë dhe përmirësojë sistemin e tij zgjedhor sipas kontekstit kombëtar dhe konsensusit. Sidoqoftë, praktikat më të mira ndërkombëtare rekomandojnë që çdo ndryshim në sistemin zgjedhor duhet të bëhet në mënyrë gjithëpërfshirëse dhe transparente duke filluar të paktën një vit para zgjedhjeve të ardhshme të planifikuara. Ne besojmë se Shqipëria do t’i respektojë këto rekomandime dhe do të punojë më tej drejt arritjes së rezultateve të qëndrueshme në fushat kryesore të reformës. Parlamenti Evropian është i përkushtuar të mbështesë Shqipërinë në rrugën e saj të integrimit evropian dhe është i gatshëm të punojë me Parlamentin shqiptar në lehtësimin e dialogut dhe ndërtimin e konsensusit mbi reformat thelbësore në fushat e demokracisë, sundimit të ligjit dhe përgjegjshmërisë që janë të domosdoshme për BE-në e vendit të ardhmen”, thuhet në deklaratën e tyre.
