Babai i KLODIAN RASHËS apelon sërish: Më kanë thënë se në emër të tim biri po shkatërrojnë Tiranën, nuk dua që kjo të ndodhë.
Qazim Rasha, babai i 25 vjeçarit Klodian Rasha që u qëllua me armë nga një efektiv i Shqiponjave, nuk pajtohet me atë që po ndodh në Tiranë e Shqipëri në emër të vrasjes së djalit.
Këtë fakt Qazim Rasha, ia ka konmfirmuar sot paradite edhe kryetarit të Bashkisë së kryeqytetit, Erion Veliajt, që shkoi atje për një kafe ngushëllimi së bashku me deputetin e PS Ulsi Manja, raporton newsbomb.al.
“Unë deri tani nuk kam parë televizor, sepse jemi duke pritur njerëz për ngushëllim. Por me ç’më kanë thënë të gjithë që vijnë, e kam marrë vesh se çfarë po ndodh. Unë e kam thënë edhe publikisht se dua të kaloj dhimbjen dhe fatkeqësinë time dhe ndihem i keqardhur për çfarë po ndodh në Tiranë. Personalisht do jem jo aq i lënduar nëse pushteti do të marrë përgjegjësitë për atë që ndodhi me djalin tim.
Unë jam në zinë time dhe nuk kam kohë, nuk kam parë e dëgjuar gjë sepse ka mijëra vetë që më kanë ardhur për ngushëllim. Por nuk dua që kryeqyteti të dëmtohet. Asnjë lule, asnjë semafor, asnjë shtyllë. Më vjen shumë keq që po përdorin emrin e tim biri dhe këtë po e bëjnë dhe dëmtojnë Tiranën”, i ka thënë babai i Klodian Rashës, Qazim Rasha, kryebashkiakut Erion Veliaj