Gjykata e Tiranës caktoi masën “arrest në burg” për ish-ushtarakun 37-vjeçar, i cili dyshohet se i shkaktoi vdekjen fqinjit të tij duke e rrahur ditën e mërkurë.demiri
Fatmir Demiri, në deklarimin e tij pas arrestimit, ka pranuar se e ka rrahur fqinjin e tij 61 vjeç, Dorian Latollari, por është shprehur se e ka lënë të gjakosur në tokë pa e ditur se mund të vdiste. Mbështetur në këtë dëshmi, edhe avokati i Demirit ka kërkuar që të pritet ekspertiza mjeko-ligjore, për të mësuar me saktësi shkakun e vdekjes së Latollarit, pasi vdekja mund t’i ketë ardhur edhe nga shkaqe natyrale dhe jo nga dhuna.
Megjithatë, Gjykata pranoi kërkesën e Prokurorisë dhe vendosi masën “arrest në burg”. Dorian Latollari, që u gjet i vdekur në oborrin e banesës së tij ditën e mërkurë në Tiranë, rezultoi të ishte vrarë duke u rrahur nga fqinji i tij 37 vjeç.
Sipas Policisë, ngjarja fillimisht është menduar si vdekje natyrale nga familjarët e Latollarit, i cili u gjet përmbys dhe i gjakosur te hundët. Duke qenë se ai pinte alkool vazhdimisht, të afërmit kanë dyshuar për ndonjë hemorragji apo ishemi dhe kanë lajmëruar ambulancën. Por në fakt nuk ka rezultuar ashtu. Mjekët kanë konstatuar dëmtime trupore që ishin shkaktuar nga ndonjë objekt i fortë. Nisur nga këto rrethana, është lajmëruar Policia.
Në vendin e ngjarjes, në rrugën “Haxhi Hysen Dalliu”, kanë shkuar shërbimet e Komisariatit nr. 3, që kanë nisur verifikimet e nevojshme, pyetjen e të afërmve. Hetimet kanë zbuluar se në fakt bëhej fjalë për një vrasje.
Janë shoqëruar disa persona, mes të cilëve edhe ish-ushtaraku Fatmir Demiri, fqinj i viktimës, që më pas rezultoi të ishte autor i ngjarjes.
Ai ka pranuar se e ka rrahur Latollarin, pasi i kishte sharë nipin, por, sipas tij, nuk ka pasur dijeni se ai ka humbur jetën. I dyshuari ka treguar se pasi 61-vjeçari është rrëzuar në tokë, e ka lënë aty dhe ka ikur.
Policia e Tiranës tha të premten se është ndaluar një 37-vjeçar për veprën penale të vrasjes, i dënuar më parë për dezertim nga shërbimi ushtarak. Shërbimet e Komisariatit të Policisë Nr. 3, me marrjen e njoftimit se në rrugën “Haxhi Hysen Dalliu”, në oborrin e banesës shtetasi Dorian Latollari, 61 vjeç, ishte gjetur pa shenja jete, menjëherë kanë organizuar punën për zbardhjen dhe dokumentimin e plotë të rrethanave të ngjarjes.
Specialistët për Hetimin e Krimit në Komisariatin e Policisë Nr. 3, nën drejtimin e Prokurorisë, pas një pune të mirorganizuar dhe hetimeve intensive, bënë të mundur zbulimin e ngjarjes dhe kapjen e autorit të dyshuar, shtetasin Fatmir Demiri, 37 vjeç, banues në Tiranë.