Rëndohet pozita penale e Arjol Halilajt, 29 vjeçarit të arrestuar në maj, në lidhje me atentatin ndaj prokurorit të Durrësit, Arjan Ndoja.
Në atentatin e 1 nëntorit 2019, pranë mbikalimit të Shkozetit u plagos prokuroi Ndoja, miku i tij Aleksandër Laho, i njohur si “Rrumi” dhe shoferi Andi Maloku, që ndërroi jetë më pas në spital.
Fillimisht 29-vjeçari u akuzua për “përkrahje të autorit të krimit”. Ai dyshohej se kishte larguar atentatorët nga vendi ku ata braktisën mjetin nga u qëllua prokurori, në zonën e Shkafanes.
Por veprimet hetimore kanë zbuluar një sërë komunikimesh telefonike mes tij dhe të akuzuarit si një nga autorët e ngjarjes, Redian Rraja. Referuar përmbajtjes së disa sms-ve të shkëmbyera mes tyre, prokurorët kanë ngritur dyshime se Halilaj ka pasur dijeni për atentatin dhe se mund të jetë edhe një nga personat e angazhuar në organizimin e tij.
Për këtë arsye, ai dyshohet tashmë për akuzën e “vrasje të funksionarëve publikë” dhe “vrasje e dy ose më shumë personave, mbetur në tentativë”.
