Abuzimi në Babrru/ ShÇBA në “sitë” komisariatin e policisë

Shërbimi i Çështjeve të Brendshme dhe Ankesave ka nisur një hetim në lidhje me veprimet e punonjësve të policisë së Komisariatit të Kamzës në lidhje me kallëzimin e bërë dy vite më parë për një abuzim seksual ndaj një vajze të mitur, nxënëse në shkollën “Azem Hajdari” në Babrru.
Burime të sigurta konfirmojnë se në verifikim po kalojnë punonjës dhe ish punonjës të këtij komisariati pasi ka dyshime se nuk janë kryer veprimet e nevojshme hetimore për zbardhjen e ngjarjes. Hetime janë duke u kryer edhe për rastin e abuzimit të 15-vjeçares.
Gjithashtu janë duke u marrë dëshmi të zyrtarëve dhe ish zyrtarëve të policisë. Ndërkohë, më herët edhe Prokuroria e Tiranës ka bërë me dije se hetimet për ngjarjen në Kamzë, janë shtrirë edhe në zyrtarë të Ministrisë së Arsimit.
Kujtojmë se skandali i abuzimit me 15-vjeçaren në shkollën në Babrru nxori në dritë raste të tjera, si dhe faktin që shkolla ka njoftuar Ministrinë e Arsimit, e kjo e fundit nuk ka ndërmarrë asnjë veprim. D.D. V.M