Nga 1 janari paga minimale në Shqipëri do të jetë 30 mijë lekë. Ky është vendimi i marrë nga qeveria në mbledhjen e djeshme, duke sanksionuar që në Shqipëri askush të mos paguhet më pak se kjo shifër.
Sipas këtij vendimi: Paga bazë minimale mujore jepet për 174 orë pune në muaj, të kryera gjatë kohës normale të punës. Aktualisht kjo pagë minimale ishte 26 mijë lekë.
Me rritjen e pagës gjithashtu pritet të rritet edhe pagesa e kontriubuteve sigurimeve shoqërore. Punëdhënësit në Shqipëri që nuk paguajnë pagën minimale mund t’i nënshtrohen dënimit nga qeveria e Shqipërisë. Ky vendim pritet të prekë jo pak edhe biznesin fason që deri më tani i ka paguar punonjësit me një pagë minimale.
Vendimi: PËRCAKTIMIN E PAGËS MINIMALE NË SHKALLË VENDI
Në mbështetje të nenit 100 të Kushtetutës, të nenit 111, të ligjit nr.7961, datë 12.7.1996, “Kodi i Punës i Republikës së Shqipërisë”, të ndryshuar, dhe të nenit 4, të ligjit nr.10405, datë 24.3.2011, “Për kompetencat në caktimin e pagave dhe shpërblimeve”, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Paga bazë minimale mujore, për punonjësit, në shkallë vendi, që është e detyrueshme të zbatohet nga çdo person, juridik a fizik, vendas ose i huaj, të jetë 30 000 (tridhjetë mijë) lekë.
2. Paga bazë minimale mujore jepet për 174 orë pune në muaj, të kryera gjatë kohës normale të punës.
3. Paga bazë minimale orare të jetë 172.4 (njëqind e shtatëdhjetë e dy pikë katër) lekë.
4. Shtesat me karakter të përhershëm jepen mbi pagën bazë.
5. Vendimi nr.809, datë 26.12.2018, i Këshillit të Ministrave, “Për përcaktimin e pagës minimale në shkallë vendi”, shfuqizohet.
Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2021.