Xhambazi i Bashkisë-Kavajë e nis 2021-in, me dhënie qira 15 400 m2 në bregdetin Qerret, për 20 vite me 500 lekë/ha në muaj
Kryebashkiaku Redjan Krali, ka bërë shpalljen e ankandit më 31 dhjetor, pa e miratuar në Këshill/ Kjo sipërfaqe toke kategori e I-rë turistike, po jepet me çmim toke “pa frut” kategori e X-të, sikur është kullotë në malet e Kukësit e jo siç është faktikisht, tokë bregdetare me park të pyllëzuar, për të cilin nga Agjencia Kombëtare e Mjedis-Rekracion-Turizëm, janë shpenzuar 2.3 milionë Euro për mirëmbajtje e rinovim në 5 vitet e fundit
Edhe vitin 2021, krybashkiaku i Kavajës, Redjan Krali e ka nisur me vazhdimin pazareve, për dhënie tokash bregdetare me qira, sikur të jenë sipërfaqe kullota e shkurre malore, të braktisra në zonat skajore të Shqipërisë.
Por këtë herë, ndoshta me garancinë se nuk do preket nga drejtësia ashtu si deri tani për mijëra hektarë toka e plazhe të tjerë, të dhënë me qira për 15 lekë/m2 në muaj; vitin 2021 e nisur me ankande pa vendim të Këshillit Bashkiak dhe pa u mbështetur në ligjin për pasuritë lokale.
Sipas njoftimit të bërë më 31 dhjetor 2020, “krajli” i Bashkisë Kavajë, Redjan Krali, ka shpallur ankandin për dhënie me qira të 15 mijë e 400 m2 tokë bregdetare në zonën Qerret-Kavajë, me çmim 6000 lekë/1 ha në vit, ose me vlerë 500 lekë/1 ha në muaj.
Nga llogaria del sa është vlera e qirasë ditore për 1 m2 sipërfaqe park-pyll në Qerret, të cilin kryebashkiaku Redjan Krali e ka specifikuar si “Tokë pa frut”, me çmim kategori e X-të dhe jo sipërfaqe tokë bregdetare kategori “Park zonë turistike”.
Përveçse në njoftimin e ankandit, mungon Vendimi i Këshillit Bashkiak si marifet për të fshehur paligjshmërinë e këtij pazari; kryebashkiaku Krali ka përdorur Ligjin nr 93/2015 “Për Turizmin”, i cili nuk ka asnjë lidhje me qiranë e pronave.
Referuar Zonës Kadastrale 3101, Vol. 8 faqe 97, ku ndodhet kjo pasuria me nr. 57/2; rezulton se sipërfaqja është buzë detit në Qerret-Kavajë, jo në gjendje “Tokë pa frut” apo kullotë e shkurre, por si zonë ekskluzive zhvillimi turistik i përcaktuar nga AIDA (Agjencia e Investimeve), ku drejtor është Sokol Fatos Nano, kushëriri i Redjan Kralit.
Të shohim në datën 7 janar 2021 kur do bëhet ankandi, se cili do të jetë klienti i preferuar që do ta përlajë edhe këto 15 mijë e 400 m2 sipërfaqe pyll bregdetar në Qerret.
Kujtojmë e saktësojmë, se kjo sipërfaqe është vazhdim (kufi) i 3 tokave të tjera bregdetare, me sipërfaqe totale 97 mijë e 500 m2 po në Qerret; që Krajli i Bashkisë-Kavajë ka dhënë deri në muajin shtator 2020, me çmim qiraje 15 lekë/m2 në muaj./Pamfleti
