Presidenti i Serbisë, Aleksandar Vuçiç konfirmoi pjesëmarrjen e Serbisë në takimin e 2 shtatorit në Uashington.
“Ne do të marrim pjesë në bisedime dhe temat, me sa kam biseduar me Grenell, janë ekonomike”, tha Vuçiç në një intervistë për televizonin Pink të Serbisë.
I dërguari i Shtëpisë së Bardhë për dialogun Kosovë-Serbi, Richard Grenell tha se më 2 shtator ka thirrur në takim në Shtëpinë e Bardhë, liderët e Kosovës dhe Serbisë, por nuk dha detaje se cilat do të jenë temat që do të bisedohen në të.
Presidenti Vuçiç po ashtu tha se nuk e di se pse Grenell në lajmërimin e tij ka përdorur fjalën “negociata” dhe jo “bisedime”, dhe se kjo është një pyetje për të (për Grenellin).
Pjesmarrja u konfirmua më herët edhe nga kryeministri i Kosovës, Avdullah Hoti, i cili tha se me palën serbe në Shtëpinë e Bardhë do të takohen si dy shtete të pavarura.
Për takimin ka reaguar edhe ambasada amerikane në Serbi, teksa e ka quajtur atë një “lajm të mirë”.
“Takimi i liderëve të Serbisë dhe Kosovës në Shtëpinë e Bardhë do ta shtynte përpara dialogun e Brukselit dhe do të sillte më shumë stabilitet në rajon”, ka thënë kjo ambasadë përmes Twitterit./
