Një ngjarje e rëndë ka ndodhur në fshatin Goraj të Kuçovës, ku qiramarrësi ka vrarë pronarin e një stalle derrash. Krimi i rëndë mendohet se ka ndodhur për shkak të qirasë së papaguar, ndërkohë që autori ka pretenduar para policisë se pronari e ofendonte çdo ditë. Ngjarja e rëndë ka ndodhur në orët e paradites në oborrin e një lokali, ku pronari i stallës Ajet Guneli, i cili kishte pak kohë që ishte kthyer nga Anglia, ku jeton me familjen, ka debatuar me qiramarrësin Vangjel Polovina. Sipas të dhënave, ngjarja ka nisur disa ditë më parë për qiranë e papaguar, kur ata kanë debatuar mes tyre. Ndërkohë, mëngjesin e së enjtes, Guneli është ulur për të pirë kafe në lokal. Aty ka debatuar sërish me Polovinën. Pas debatit, ata janë goditur me karrige, ndërkohë që 44-vjeçari Polovina ka marrë një armë automatike në stallë dhe ka qëlluar plot 60 plumba ndaj Gunelit. 41-vjeçari ka ndërruar jetë në vend nga plagët e marra, ndërkohë që policia e njoftuar nga banorët e fshatit ka mbërritur në vendin e ngjarjes. Brenda pak minutash, policia ka vënë në pranga autorin e këtij krimi, ndërkohë që ngjarja e rëndë ka tronditur banorët e fshatit të qetë të Kuçovës.
Menjëherë pas këtij krimi, policia ka marrë në pyetje autorin 44-vjeçar, i cili ka pretenduar se vrasjen e ka kryer pas Guneli e ka sharë e ofenduar vazhdimisht prej disa ditësh. Ndërkohë, dëshmitarët e tjerë kanë treguar se ata kanë debatuar për borxhin e qirasë, pasi prej një viti e gjysmë nuk ia kishte paguar për magazinën e derrave