Shkodra u trondit mbrëmjen e 17 gushtit 2020 nga të shtënat me kallashnikov, një prej të cilëve i mori jetën Gledis Krajës, vetëm 23 vjeç.
Ngjarja e rëndë u regjistrua në lagjen “Daniel Matlija”, fare afër banesës së të riut.
Mbrëmjen e së hënës Gledisi po qëndronte jashtë marketit ku punonin prindërit e tij e makinën e punës e kishte parkuar, kur u qëllua me armë të modifikuar 18 herë, nga kati i dyte i një pallati rreth orës 21:55.
Njëri prej plumbave kapi 23-vjeçarin në shpatull dhe ka shkuar direkt në zemër. Plumbat e tjerë kanë bërë shoshë makinën e punës.
Edhe pse u dërgua me urgjencë në spitalin rajonal të Shkodrës, plumbi i marrë, nga 18 të shtënat i shkaktoi vdekjen ish-futbollistit të moshave në ekipin e Vllaznisë.
Gledis mund te jetë vrarë gabimisht- Policia arrestoi sot (18 gusht) Stjuart Smakaj si autorin e dyshuar pasi kishte rrethuar zonën dhe negociatave me familjarët.
“Ky shtetas gjatë një konflikti të çastit ka tentuar të vrasë me armë zjarri shtetasin D. H., ku si pasojë aksidentalisht ka ngelur i plagosur rëndë shtetasi G.K., 23 vjeç banues në lagjen “Perash”, Shkodër, i cili më pas ka ndërruar jetë në Spitalin Rajonal Shkodër” informoi policia sot.
Objektivi, Denis Halili ka arritur të largohet duke i shpëtuar plumbave. Dyshohet se sherri ka nisur për vend parkimi mes vëllezërve Smakaj dhe një grupi tjetër personash. Stjuart ka shkuar në banesë ka marrë armën dhe ka qëluar nga kati i dyte i pallatit.
Sigurohen kamerat- Policia arrestoi sot të dyshuarin si autor të krimit Stjuart Smakaj dhe në orët në vazhdim do të zbardhen dhe detaje të tjera nga krimi i rëndë.
Në cilësinë e provës materiale janë sekuestruar arma e zjarrit 18 gëzhoja të qitura nga kjo armë zjarri , automjetet të cilat janë të palëve në konflikt, si dhe vijon puna intensive për dokumentimin ligjor të kësaj ngjarjeje.
Smakaj është një emër i njohur për policinë në vitin 2015 rezultoi se ka sulmuar tre efektivë policie me sende të forta duke i plagosur./Ora News