Deklaratë e Unionit të Gazetarëve Shqiptarë
Vrasja e reporterit të New York Times në Ukrainë, një akt kriminal dhe kërcënim serioz mbi reporterët e luftës në këtë front
Rreziku dhe kërcënimi i jetës së reporterëve të luftës në Ukrainë është më i lartë se kurrë. Sot komuniteti i gazetarëve nëpër gjithë Botën është i trondotur nga humbja e jetës e reporterit dhe regjisorit të New York Times. Ndërsa po raportonte dhe punonte gjatë ditëve të fundit në Irpin, reporteri dhe regjisori Brent Renaud u vra nga ushtarët rusë. Ndërkohë që një tjetër gazetar është lënduar. Këtë e ka bërë të ditur me anë të një postimi, shefi i policisë së rajonit, Andrei Nebitov. Forcat e sigurisë ukrainase, konfirmuan se Brent Renaud u vra dhe një koleg i tij u plagos në Irpin, një qytet në periferi të Kievit, ku luftimet midis forcave ruse dhe ukrainase vijojnë prej disa ditësh.
Unioni i Gazetarëve Shqiptarë dënon me forcë këtë krim mbi reporterët dhe kërkon nga gjithë institucionet ndërkombëtare një reagim të fuqishëm. Brent Renaud dhe vëllai i tij Craig Renaud janë regjisorë, producentë televizivë dhe programues filmash, të cilët gëzojnë një reputacion profesional ndërkombëtar.
UGSH shpreh dhimbjen e thellë për humbjen e jetës së kolegut dhe plagosjen e gazetarit bashkëraportues si dhe apelon për mbrojtjen e jetëve të gazetarëve dhe reporterëve që me kurajo dhe guxim të lartë profesional vijojnë raportimet e tyre për interes të opinionit botëror rreth asaj që po ndodh në Ukrainë gjatë kësaj lufte.
UGSH shpreh inkurajimin dhe lutjen për gjithë kolegët, veçanërisht ata shqiptarë që aktualisht raportojnë nga Kievi dhe zona të tjera, ku përshkallëzimi i luftës dhe barbaria me armë, shuan jetë njerëzish.
UGSH shpreh ngushëllimet e thella pranë familjes dhe miqve të tij, për këtë humbje kolegu dhe urojmë shëndet e mbarësi për gjithë kolegët që aktualisht informojnë nga ky front i egër lufte.
Zyra Informuese
Unioni i Gazetarëve Shqiptarë
