Vijon shkatërrimi në lumin Zall-Gjoçaj/ Kompania dikur në pronësi të Bashkim Ulajt, dëmton varrezat 500-vjeçare!
Prej disa kohësh banorë të fshatit të Matit kanë kundërshtuar punimet që po kryhen nga kompania koncesionare “Seka-Hidropower” për ndërtimin e HEC-it të Sekës në lumin Zall-Gjoçaj. Banorët ankohen për këtë vepër, pasi tremben se ndërtimi i hidrocentralit do të shterojë burimet ujore të zonës. Por punimet e kësaj firme private, kanë sjellë të tjera probleme, teksa mësohet se janë dëmtuar edhe varrezat 500-vjeçare të fshatit Melth, në hyrje të Parkut Kombëtar Zall-Gjoçaj. Problemin në fjalë e kanë konstatuar një grup aktivistësh, të cilët ishin në terren dhe vunë në dukje dëmet e shkaktuara nga puna që po bën firma private dhe kjo përmes hedhjes së gurëve dhe inerteve, ndërsa avokatja e banorëve të Matit Dorina Ndreka ka deklaruar se banorët e zonës vuajnë mungesën e ujit të pijshëm dhe se i kanë dërguar një ankesë Bashkisë së Matit për problemin në fjalë. Firma ndërtuese e cila njihet në treg si “Seka-Hidropower”, e cila deri para vitit 2013 ka qenë në zotërim të shoqërisë “Gener 2” të Bashkim Ulaj, ndërsa sot zotërohet nga shoqëria HYDRO-PROJECT dhe ka për administrator Sokol Mucekun dhe Fabio Scuero.
