Në shkollat e vendit vijon programi “Toka në shkolla”, i cili mbështet zhvillimin e aftësive të nxënësve për kultivimin e kulturave bujqësore.
Kryeministri Edi Rama ndau sot në rrjetet sociale pamje nga vizita e ministres së Arsimit dhe Sportit, Ogerta Manastirliu në shkollën “Gjergj Fishta” në kryeqytet, ku së bashku me nxënësit mbollën perime, fruta dhe lule.
“Me nxënësit tanë, që përmes përvojës praktike në kuadër të programit “Toka në Shkollë”, të cilin po e mbështesim përmes Ministrisë së Arsimit dhe Sportit, mësojnë të kujdesen për natyrën duke mbjellë, rritur dhe korrur prodhime të freskëta”, shkruan Rama në rrjetet sociale.
Sezoni i mbjelljeve ka vijuar në serat dhe kopshtet e shkollave, ku përmes programit “Toka në Shkollë”, nxënësit kultivojnë perime, zarzavate, pemëtari dhe lule të ndryshme duke zhvilluar aftësi praktike dhe dashurinë për mjedisin.
Nxënësit u shprehën se perimet pasi i vjelin i dërgojnë për njerëzit në nevojë ose komunitetit. “Jo vetëm kemi mësua si të punojmë tokën, por na ka ndihmuar të bëjmë edhe eksperiment në orën e biologjisë”, tha një nxënëse.
“Toka në Shkollë” është një nismë e Ministrisë së Arsimit dhe Sportit, e shtrirë në shkolla në mbarë vendin, ku nxënësit jo vetëm zhvillojnë aftësi praktike, por edhe ndërgjegjësohen për rëndësinë e mjedisit dhe ushqyerjes së shëndetshme.
Gjithashtu ky program synon të zhvillojnë aftësitë praktike për kultivimin, me synim lidhjen e fëmijëve dhe të rinjve me natyrën dhe traditat, si një mjet për edukimin mjedisor dhe jo vetëm.
