Deklaratë e Unionit të Gazetarëve Shqiptarë
Draft-opinioni i Komisionit të Venecias për paketën Antishpifje një dokument i arsyetimit juridik i pretendimeve tona kundër nismës së qeverisë
Tiranë më 05.06.2020
Përfundimet e sjella në Draft-Opinionin e Komisionit të Venecias për projekt amendamentet e ligjit të njohur si Paketa Antishpifje, janë një përgjigje pa ekuivok kundër nismës së qeverisë për të krijuar një realitet cungues të lirisë së shprehjes në mediat online të vendit. Unioni i Gazetarëve Shqiptarë shpreh dakordësinë e plotë me opinionin e Komisionit të Venecias i cili konstaton se :
“Ligji vuan nga paqartësitë dhe rrezikon të shtypë në mënyrë të ngurtë diskutimin e lirë dhe shprehjen politike përmes internetit në Shqipëri”. Sipas draft-opinionit, Komisioni i Venecias rikonfirmon si një ndër të metat e paketës së qeverisë, arsyetimin e UGSH-së, synimi për të zgjeruar kompetencat e AMA-s dhe Këshillit të Ankesave, çka rrit rrezikun që blogerët dhe përdoruesit e platformave sociale do të goditen nga kjo paketë projekt-ligjesh.
Draft-opinioni i Komisionit të Venecias, nënvizon si një tjetër mangësi, kërkesën e ligjit për zbulimin e burimeve të mediave online. “Kjo mund të shkojë në kundërshtim me standartin ndërkombëtar, sipas të cilit, duhet respektuar gjithmonë dëshira e përdoruesve të internetit për të mos zbuluar identitetin e tyre” – theksohet në Draft-Opinionin e Komisionit të Venecias. Në draft sugjerohet edhe ndryshimi i formulës së zgjedhjes së anëtarëve të Bordit të AMA-s, kërkesë e paraqitur me konsistencë nga UGSH. Po kështu në këtë draft, mbështetet arsyetimi i UGSH-së se: “Kapaciteti ekonomik i këtyre mediave online nuk është një faktor që merret parasysh në përmasat e gjobës, e cila mund të sjellë paralizimin e mediave të vogla (edhe të blogerëve individualë) me gjoba joproporcionale në raport me fuqitë e tyre” .
UGSH mbështet sugjerimet e Komisionit të Venecias për rishqyrtymin e miratimit të projekt-ndryshimeve në ligjet përkatëse, të votuara nga parlamenti shqiptar në dhjetor 2019. UGSH vlerëson nxitjen që Komisioni i Venecias u bën autoriteteve ligjbërëse në vend, për mbështetjen e ngritjes së një njësie vetë-rregulluese, me funksionim të efektshëm, ku të përfshihen gjithë aktorët përkatës në fushën e medias, të aftë për të siguruar një sistem të respektueshëm për media të përgjegjshme në fushën e gazetarisë online.
Unioni i Gazetarëve Shqiptarë e vlerëson këtë draft-opinion si një argument shterues që qeveria e kryemonistrit Edi Rama dhe shumica parlamentare të tërhiqen përfundimisht nga kjo nismë e cila ofron një risk të madh për lirinë e shprehjes dhe atë të mediave të reja në vend.
Zyra e Shtypit
Unioni i Gazetarëve Shqiptarë
