Tender i dyshimtë në Mallakastër/ 550 milionë lekë për 3 muaj punë: U skualifikuan të gjithë që ofruan më pak, fitoi oferta më e shtrenjtë!
Një tender i zhvilluar nga Bashkia Mallakastër për objektin “Mbrojtje Lumore Gjatësore e Tokave Bujqësore në fshatin Corrush” po ngre një sërë pikëpyetjesh mbi mënyrën e zhvillimit të procedurës dhe nivelin real të konkurrencës, bazuar në dokumentacionin zyrtar të prokurimit dhe vendimet e institucioneve përkatëse.
Tenderi, me fond limit 55,214,284 lekë pa TVSH, u zhvillua përmes procedurës së hapur dhe në garë morën pjesë 6 operatorë ekonomikë. Megjithatë, ajo që bie menjëherë në sy është fakti se të gjithë operatorët u skualifikuan në fazën fillestare, përfshirë edhe bashkimin e operatorëve që më pas do të shpallej fitues.
Sipas dokumenteve, Komisioni i Vlerësimit të Ofertave skualifikoi çdo subjekt për arsye të ndryshme teknike dhe administrative: mungesë stafi specifik në licencë, mosplotësim kriteresh për punë të ngjashme, gabime formale në sigurimin e ofertës apo mungesë dokumentacioni financiar. Një nga operatorët nuk paraqiti fare ofertë ekonomike.
Pas këtyre skualifikimeve, tre operatorë paraqitën ankesa në Komisionin e Prokurimit Publik (KPP). Dy prej tyre u rrëzuan, ndërsa ankesa e bashkimit të operatorëve “Ardmir” SHPK & “Meteo” SHPK u pranua nga KPP, i cili urdhëroi autoritetin kontraktor të kryente rivlerësimin e procedurës.
Pas rivlerësimit, Bashkia Mallakastër vijoi procedurën dhe shpalli fitues pikërisht bashkimin e operatorëve që më herët ishte skualifikuar, me një ofertë prej 52,483,400 lekë pa TVSH, shumë pranë fondit limit. Në praktikë, kjo do të thotë se mbi 95% e fondit të planifikuar do të shpenzohet, pa u reflektuar një kursim domethënës për buxhetin publik.
Një tjetër element që ngre pikëpyetje është fakti se ofertat potencialisht më të ulëta ekonomike nuk arritën të konkurronin realisht, për shkak të skualifikimeve që lidhen kryesisht me kritere teknike dhe formale. Kjo sjell në vëmendje debatin e vazhdueshëm mbi përdorimin e kritereve të tilla si “filtra” që kufizojnë konkurrencën, edhe pse ligjërisht mund të jenë të justifikuara.
Nga ana tjetër, kohëzgjatja e kontratës është vetëm 3 muaj, ndërsa vlera e punimeve për mbrojtje lumore kap shifrën e mbi 550 milionë lekëve të vjetra me TVSH, një raport që për ekspertët e fushës kërkon transparencë maksimale mbi volumet reale të punës dhe çmimet njësi.
Në redaksi ka mbërritur edhe një denoncim nga një qytetar i Mallakastrës, i cili shpreh shqetësimin se procedura krijon perceptimin e një gare formale dhe jo reale, ku fondet publike përfundojnë pa konkurrencë të vërtetë dhe pa ulje çmimi.
Deri në këtë fazë, dokumentet nuk provojnë shkelje penale, por modeli i skualifikimeve masive, rivlerësimit selektiv dhe fituesit me ofertë pranë fondit limit përbën një rast që meriton vëmendje dhe monitorim nga institucionet përgjegjëse të kontrollit dhe auditimit.
Pyetja që mbetet e hapur është: A u sigurua realisht konkurrencë efektive në këtë tender dhe a u mbrojt interesi publik në përdorimin e fondeve të Bashkisë Mallakastër?
