OSBE ka dalë kundër nismës së opozitës parlamentare dhe të mbështetur nga një pjesë e deputetëve të PS për ndryshimin e sistemit zgjedhor dhe listat e hapura.
Përfaqësues të këtij institucioni deklaruan sot, në mbledhjen e përbashkët të Këshillit të Legjislacionit dhe të Komisionit të Ligjeve, se koha nuk premton për realizimin e kësaj nisme.
Florian Hobdari, ekspert i OSBE, tha se institucioni që ai përfaqëson nuk përfshihet në debatet mbi sistemet zgjedhore, pasi është një vendim sovran i vendeve anëtare. Sipas tij, OSBE është e gatshme që të mbështesë procesin e ndryshimeve ligjore e kushtetutese nëse do të jetë nevoja, por kujtoi se nuk ka kohë për realizimin e tyre.
OSBE sjell në vëmendje një rekomandim të Këshillit të Europës, që thotë se diskutimet për ndryshimin e sistemeve zgjedhore duhet të nisin të paktën një vit para zgjedhjeve.
“Në rastet kur një vend anëtar i OSBE-së kërkon ndryshimin e sistemit zgjedhor, ne si organizatë ofrojmë mbështetje për procesin përmes të cilit ky ndryshim kryhet. Ky proces, sipas praktikave më të mira ndërkombëtare dhe të theksuara me forcë nga Këshilli i Europës, duhet të nisë të paktën 1 vit para zgjedhjeve të radhës dhe duhet të jetë gjithëpërfshirës dhe transparent”, deklaroi Florian Hobdari. Petg:DdVm
