Shqipëria më e shtrenjtë në çmimin e bukës, qumështit dhe mishit

Shqipëria është vendi me çmimet më të larta të produkteve ushqimore në rajon. EUROSTAT njofton se çmimet e ushqimeve vlerësohen sa 81% e mesatares së Bashkimit Europian. Ndërkohë, produktet më të shtrenjta për shqiptarët janë qumështi, djathi, mishi, peshku dhe vezët, në krahasim me mesataren e BE-së. Edhe përsa i përket bukës një ndër produktet e pazëvendësueshme për një familje shqiptare, Shqipëria renditet një ndër vendet me çmimet më të larta. E dyta më e shtrenjtë pas Shqipërisë është Serbia, me 77.1% të mesatares së BE-së, Mali i Zi (76.6%),  Bosnja (74.5%).
Po kështu, një familje shqiptare shpenzon 44% të të ardhurave vetëm për sigurimin e ushqimeve. Vendi ynë renditet në vendin e 102-të në botë dhe ndër të fundit në rajon sa i përket të ardhurave për frymë.
Në Europë, më e shtrenjta për ushqimet është Zvicra, me 166% të mesatares europiane. Edhe për bukën, sërish është Zvicra më e shtrenjta (154%). Pas Zvicrës renditen shtetet si  Norvegjia, Islanda, Danimarka, Luksemburgu, Austria, Finlanda dhe Franca.