Një grup shkencëtarësh në Universitetin e Hjustonit në SHBA, kanë dizenjuar një filtër ajri që është i aftë të shkatërrojë koronavirusin në moment. Ky studim, i publikuar në revistën “Materials Today Physics”, thotë se filtri arrin të eliminojë 99,8% të patogjenit që shkakton COVID-19.
Kërkuesit shkencorë amerikanë theksojnë se prodhimi komercial mund të nisë menjëherë dhe gjithashtu ata mendojnë se koronavirusi nuk mund të mbijetojë në temperatura mbi 70 gradë dhe për këtë arsye e kanë prodhuar filtrin duke e nxehur në 200 gradë Celcius, duke e bërë të pamundur për koronavirusin që të kalojë përmes tij dhe në këtë mënyrë të zhduket.
Sakaq, kujtojmë se Organizata Botërore e Shëndetësisë pranoi se COVID-19 mund të përhapet përmes ajrit, sidomos në ambiente të mbyllura.
Në kushte normale, virusi mund të qëndrojë në ajër për 3 orë dhe prandaj ky filtër është i dobishëm për aeroportet, avionët, zyrat dhe shkollat.
