Po numëronin paratë e vjedhura, Sadri Abazi dhe Tom Doshi nuk u paraqitën në Kuvend gjatë një viti, ja si e përdorin mandati për plaçkitje
Si e ka kthyer Edi Rama Kuvendin në hon të kokave të trafiqeve dhe korrupsionit, përdorin mandatin e deputetit për të vjedhur buxhetin e shqiptarëve me tendera dhe duke plaçkitur pasuritë publike. Disa fakte që duhet të ngrenë në këmbë shqiptarët. Tom Doshi 1 700 tendera, Sadriu 30 milionë euro të vjedhura
Në një vend normal demokratik deputetët zgjidhen dhe shkojnë në Kuvend, për të shqyrtuar dhe miratuar ligje në interes të popullit dhe për zhvillimin e vendit. Në Shqipëri, Kuvendi është kthyer në një paradhomë ku një tufë hajdutësh dhe trafikantësh, me miratimin e Edi Ramës, vjedhin buxhetin e shtetit dhe plaçkitin pasuritë publike.
Sot po sjellim dy shembuj konkret se si përdoret Kuvendi dhe mandati i deputetit për plaçkitje. Faktet duhet të ngrenë në këmbë çdo shqiptar jo vetëm kundër Edi Ramës dhe çetës së tij të krimit dhe korrupsionit, por kundër të gjithë kastës politike shqiptare, e cila nuk mund të krahasohet me asnjë pushtues sa i takon plaçkitjes dhe rrënimit të vendit.
Shembuj ilustrues janë Sadri Abazi dhe Tom Doshi, dy deputetë simbole të korrupsionit dhe krimit, mediokër, të pashkollë, thuajse analfabetë, por mjeshtra në vjedhje dhe mbledhje votash, klane dhe klientelizëm.
Gjatë vitit 2020, Tom Doshi dhe Sadri Abazi janë paraqitur vetëm 2-3 herë në Kuvend, duke marrë pjesë në Komisionet Parlamentare, aty ku përgatiten ligjet, duke ngritur kartonin jeshil pro Edi Ramës. Dy deputetët nuk kanë bërë asnjë propozim apo diskutim për ligjet, jo vetëm gjatë vitit 2020, por që kur kanë hyrë për herë të parë në Kuvend. Asnjë ligj apo ndryshim ligji nuk mban firmën e tyre. Veprimtaria e tyre parlamentare është prej vitesh zero. Në këto rrethana, lind natyrshëm një pyetje pse Tom Doshi dhe Sadri Abazi këmbëngulin për të qenë pjesë e Kuvendit prej 15 vitesh, kur nuk kanë asnjë lidhje me misionin kushtetues të Kuvendit? Madje sipas një raporti sekret të OSBE, Sadri Abazi ka paguar deri gjysmë milioni euro për mandatin e deputetit, pra për ta futur Rama në listën e radhës.
Përgjigja është shumë e thjeshtë. Sadri Abazi dhe Tom Doshi e përdorin mandatin e deputetit vetëm për të mbrojtur bizneset e tyre dhe për të grabitur buxhetin e shtetit me tendera, me anë të kompanive që i kanë kaluar në emër të nipave, familjarëve dhe shokëve. Votën e tyre, edhe pse shkojnë shumë rrallë në Kuvend, e mbajnë për rastet kur Babloku është në vështirësi, duke ngritur kartonin qorrazi lart, por edhe si presion kur Babloku nuk ndan sipas ‘meritës’ paratë e shqiptarëve. Vetëm me tenderat korruptivë të pastrimit, Sadri Abazi, me kompaninë e nipit të tij, ka marrë rreth 30 milionë euro nga paratë publike.
Nga ana tjetër, Tom Doshi ka marrë mbi 1700 tendera vetëm në sektorin e shëndetësisë, me një kompani që ka kaluar në emrin e një shoku të tij. Nuk është rastësi që Shtetet e Bashkuara të Amerikës e kanë futur në listën e zezë, megjithatë, Babloku vijon pazaret me të.
Një tjetër arsye se pse Sadri Abazi dhe Tom Doshi e kanë çështje jetike mandatin e deputetit, edhe pse nuk shkojnë fare në Kuvend, ka të bëjë me frikën nga arrestimi. Mandati i deputetit i vesh ata me imunitet, ku SPAK i duhet të marrë miratimin e Kuvendit për t’i arrestuar. Këtu hyn në lojë vota e deputetëve, ku dihet se janë bashkë dhe mbrojnë njëri-tjetrin përballë drejtësisë. Edi Rama nuk i lëshon Tom Doshin dhe Sadri Abazin pasi i duhen për vota. Me një pjesë të parave publike që vjedhin me tendera, ata blejnë vota në zgjedhje dhe kështu riciklohen dhe vijon mekanizmi bashkëpunues. Nga çdo pikëpamje, Edi Rama është koka mbi kokat e korrupsionit në Shqipëri. Jo rastësisht, në raportet e Evropës dhe SHBA, qeveria e tij konsiderohet si më e korruptuara në kontinent./Pamfleti
