Rusia nisi një breshëri sulmesh gjatë natës në Ukrainë, duke e goditur Kievin me dronë, ku humbën jetën 5 persona, dhe duke lëshuar raketa në qytetin e Lvivit, në perëndim.
Moska njoftoi se kishte goditur Lvivin me raketa Oreshnik në “hakmarrje” ndaj sulmit të fundit me dron ndaj rezidencës së Presidentit rus Vladimir Putin në rajonin e Novgorodit në fund të dhjetorit, i cili nuk u konfirmua kurrë nga burime të pavarura.
Oreshnik është një lloj i ri rakete hipersonike, e aftë të mbajë një kokë bërthamore.
Mediat ndërkombëtare raportuan më parë se një raketë balistike me rreze të mesme veprimi (IRBM) Oreshnik me teknologji MIRV goditi rajonin e Lvivit, vetëm 70 kilometra larg kufijve me Poloninë, BE-në dhe NATO-n , në orën 23:45 sipas kohës lokale.
Kievi, i cili ka mohuar më parë sulmin ndaj rezidencës së Putinit, tha se përpjekja e Rusisë për të justifikuar sulmin duke përsëritur atë pretendim është “absurde”.
Ministri i Jashtëm i Ukrainës, Andrii Sybiha tha se sulmi rus është një tjetër provë për Perëndimin se rusët nuk duan paqe.
“Rusia pretendon se ka përdorur një raketë balistike me rreze të mesme veprimi, të ashtuquajturën ‘Oreshnik’, kundër rajonit të Lvivit. Një sulm i këtij lloji pranë kufirit me BE-në dhe NATO-n përfaqëson një kërcënim serioz për sigurinë e kontinentit evropian dhe një provë për komunitetin transatlantik”, tha Sybiha, i cili shpjegoi se Kievi “po informon Shtetet e Bashkuara, partnerët evropianë dhe të gjitha vendet dhe organizatat ndërkombëtare për detajet e këtij sulmi të rrezikshëm përmes kanaleve diplomatike”.
“Ne kërkojmë përgjigje të forta ndaj veprimeve të pamatura të Rusisë”, shtoi Sybiha.
