ME MIKUN TIM TË MREKULLUESHËM SEJMEN GJOKOLI
I privilegjuar dhe tejet i nderuar nga ftesa e përhershme në “Aulona Inter Folk Festival”, kësaj rradhe vendosa ta pranoj ftesën për këtë aktivitet madhështor, ku e pashë Vloren aq madhërishem si kurorë të dinjitetit kulturor mbarë kombëtar.
Det me valltarë,
Dritë me grupe artistike,
Diell shqiptar,
N’mes të Vlorës historike!
“Aulona Inter Folk Festival” ky emër sa motivues po aq edhe autentik, shpalosi siparin e edicionit të 13-të tij në qytetin e mrekullive ku bashkë me të katër pasuritë e natyrës; relievin, ajrin, diellin dhe detin u gërshetuan krejt këndshëm arti, kultura, tradita dhe dinjiteti i këtij qyteti, ku gjithça lidhet me emrin e një njeriu, Sejmen Gjokoli, pasi largpamësia dhe konributi i tij individual prej vizionari në sektorin e kulturës e ngre këtë festival në peshën e një institucioni të përkushtuar.
I privilegjuar të ndjek hap pas hapi deri në detaje këtë festival dhe aktivitetet ditore të organizuar në shenjë mikpritje për grupet dhe shoqëritë kulturore pjesëmarrse vura re se me sa shije e kujdes ishin përzgjedhur hapësirat publike e kulturore deri tek ato gastronomike, ku të pranishmit të merrnin kënaqësi të shumëfishta, të cilat njëkohsisht përkthehen në shërbim të drejtpërdrejtë të turizmit kulturor e detar në këtë kohë sezoni turistik.
I përfshirë në brendësi si publicist dhe gazetar u informova edhe për detajet e organizimit të këtij festivali dhe stafit të punës, të cilët rezultuan të jenë të gjithë njerëz të artit e kulturës, specialistë të trashëgimisë kulturore dhe pasionantë të ruajtjes dhe kultivimit të vlerave kulturore shpirtërore, ku kryesonte Sejmen Gjokoli, “Mjeshtër i Madh” dhe drejtor i përgjithshëm i festivalit, i cili me vullnet të pashoq e sfidoi pandeminë për Vlorën e tij të shtrenjtë, për kulturën dhe folkorin që na lidh pa përjashtim me rrënjët tona të thella sa vetë historia.
E uroj nga zemra këtë intelektual dhe artist, duke i uruar atij jetë të gjatë, por veçanërisht të suksesshme në këtë mision kaq fisnik për ruajtjen dhe promovimin e kulturës sonë mbarëkombëtare.
Urime edicionit XIII i “Aulona Inter Folk Festival”!
