Presidenti i Serbisë, Aleksandër Vuçiç është takuar me kryeministrin Edi Rama në Moldavi, pas tensioneve në veri të Kosovës.
Lideri serb ka publikuar foto nga takimi në rrjetin e tij social Instagram, ku zbuloi detaje nga biseda mes tyre.
“Ne në rajon e dimë më së miri se sa e rëndësishme është që bashkërisht të bëjmë çdo përpjekje për të ruajtur paqen dhe stabilitetin e fituar me vështirësi. Diskutuam ngjarjet aktuale dhe hapat e mëtejshëm që do të kontribuonin në gjetjen e një zgjidhjeje për situatën aktuale të vështirë dhe serioze, me shpresën se arsyeja do të mbizotërojë, në të mirë të të gjithëve”, shkruhet në postim.
Tensionet në veri të Kosovës është një ndër temat kryesore në samitin e dytë të Komunitetit Politik Evropian (EPC) që po mbahet sot në Kishnjev të Moldavisë.
Në një prononcim për median në prag të samitit, shefi i Bashkimit Evropian për Politikë të Jashtme dhe Siguri, Josep Borrell tha se për Kosovën dhe Serbinë, dhuna nuk është rrugë dhe çdo njëri duhet të angazhohet për depërshkallëzim të situatës në veri.
Presidentja e Kosovës Vjosa Osmani akuzon presidentin Vuçiç se po mbështet bandat kriminale në veri të Kosovës dhe kërkon ndihmën e ndërkombëtarëve të ndihmojnë për të ndalur veprimet destabilizuese të Serbisë.
Nga ana tjetër, Vuçiç u bëri thirrje autoriteteve të Kosovës që t’i tërheqin, siç i quajti ai, “kryetarët e supozuar” nga komunat me shumicë serbe në veri, për t’i ulur tensionet që kanë shkaktuar dhunë.
Presidenti i Serbisë tha për Tanjug, se mëngjesin e sotëm ka folur me serbët nga veriu i Kosovës dhe Metohisë dhe ka kërkuar nga ata që të këmbëngulin në luftën për ligj dhe drejtësi, por mbi të gjitha ta bëjnë këtë në mënyrë paqësore në lidhje me KFOR-in.
Deri tani në tri komunat e veriut të Republikës së Kosovës, Zveçan, Zubin Potok dhe Leposaviç, raportohet se situata është e qetë. Serbët janë grumbulluar para ndërtesave të komunave për të kërkuar sërish largimin e kryetarëve shqiptarë të këtyre komunave dhe të njësive të posaçme të policisë së Kosovës.
