Presidenti Ilir Meta ka kërkuar informacione nga Prokuroria e Përgjithshem për të gjithë emrat e propozuar si ministra nga kryeministri Edi Rama, për të ndërtuar qeverinë e re. Në shkresën drejtuar Prokurorisë thuhet se Meta, kërkon të informohet në një kohë sa më të shpejtë në lidhje me procese hetimore apo penale që mund të jenë nisur për kandidatët e propozuar nga kryeministri.
Kreu i Shtetit kërkon të dije nëse ka procese për emrat e propozuar, dhe në çfarë faze janë ato. Në kërkesë theksohet se përgjigjet duhet të kthehen sa më shpejt, në mënyrë që Presidenti të shprehet për emërimet brenda 7 ditëve, siç edhe e kërkon procedura.
Vetëm një ditë më parë Presidenti Ilir Meta ka dekretuar emërimin e Edi Ramës si kryeministër të Shqipërisë, duke i dhënë dritën ‘jeshile’ për të udhëhequr qeverinë. Edhe më datë dhjetë, Meta mbështeti zgjedhjen e Lindita Nikollës në Krye të Kuvendit teksa shton te se nuk ka më kohë për bojkot, duke treguar se marrëdhëniet mes tij dhe Institucioneve si Qeveria e Kuvendi, po merrnin kthesë tjetër.
Nuk dimë të themi nëse kjo kërkesë e publikuar këtë mbrëmje është thjesht procedurë burokratike, apo Meta u kthye në pozicionin e kundërshtarit të Ramës, rol që ka mbajtur gjatë dy viteve të fundit.
