Gjatë një takimi me shoqërinë civile, ish-kryeministri Sai Berisha, zbuloi arsyet se përse shuheshin protestat e thirrura nga opozita në të kaluarën.
Sipas tij, kjo ndodhte pasi pushteti kishte kapur Partinë Demokratike përmes dosjeve, dhe në momentin që mbyllej një çështje, binte telefoni dhe protesta nuk zhvillohej më.
“E vërteta është se shoqëritë civile luajtën një rol të jashtëzakonshëm në shpërbërjen e atij sistemi në vendet e lindjes. Shoqëria civile pavarësisht agresionit që i ka bërë George Sorosit përmes lidhjeve me Partinë Socialiste, mund të themi se ju jeni një zhvillim shumë pozitiv. Nga ju konstatohet qartë se sirenat e alarmit bien kudo në Shqipëri. Ne biem dakord në një zhvillim tragjik në vend, de fakto ai sistem pluralist që ne u munduam ta ndërtojmë po varroset nga Edi Rama.
Me zgjedhjen e Presidentit të ri nga portieri, tek drejtori, tek zëvendësdrejtori, tek ministri, tek kryeministri, janë të gjithë të një partie të vetme. Ky rregull ishte deri në shkurt të vitit 1991, deri sa Ramiz Alia bëri ca ndryshime dhe futi ca nga opozita, ata që donte ai. Sot Edi Rama i ka marrë që të gjitha. Në dallim nga viti ‘91, por përpjekje të jashtëzakonshme që të rekrutojë opozitën, diktatori i fundit nuk bëri.
Edi Rama, rekrutoi opozitën, ky është akti më makabër i tij. Të marrë peng opozitën me dosje. Ato që ndodhnin me PD-në kishte vetëm këtë shkak. Se ai mbyllte x dosje dhe pastaj bëhej protesta sot, por nesër nuk mblidhej më se binte telefoni. Ky është një akt makabër, këtë e bën një njeri që është i vendosur mos të dorëzojë kurrë pushtetin”, tha Berisha.
