Procesi i kompensimit të pronave ka disa muaj që është pezulluar, por qeveria vazhdon të përcaktojë fond, që në fakt nuk shpërndahet kurrë. 3 qershor 2021 ka qenë dita e fundit që Agjencia e Trajtimit të Pronave ka njoftuar për kompensim të pronarëve dhe që prej atëherë nuk ka pasur më kompensime. Procesi është pezulluar që pas vendimit të Gjykatës Kushtetuese, e cila rrëzoi disa nene të ligjit për kompensim.
Konkretisht në datën 04.02.2021, Gjykata Kushtetuese mori në shqyrtim kërkesën e Shoqatës “Pronësi me drejtësi”, në lidhje me Kushtetutshmërinë e ligjit dhe vendimit të qeverisë. Trupi gjykues vendosi të shfuqizojë disa nene të këtij ligji.
Vendimi
Kushtetuesja e mori këtë vendim, pasi konstatoi se ligji aktual nuk garanton shpërblimin e drejtë të së drejtës së pronës private dhe cenon parimin e sigurisë juridike dhe se nuk është respektuar standardi i parashikuar në nenin 118 të Kushtetutës, për kompensimin e drejtë të pronave.
Në këto kushte Agjencia e Pronave njofton se, nuk mund të bëhet asnjë lëvizje në lidhje me kompensimet përderisa gjykata rrëzoi dy nenet më të rëndësishme të ligjit dhe kërkoi rishqyrtim të tij nga Parlamenti. Pikërisht, kjo është edhe arsyeja që deri tani nuk ka shqyrtim të aplikimeve për kompensim pronash. Situata do të vazhdojë deri në një afat ende të pacaktuar. Por, pavarësisht kësaj, edhe për 2021, edhe për 2022, qeveria ka përcaktuar një fond për kompensimet e pronave, konkretisht 50 milionë dollarë. Me shumë gjasa ky fond do të mbetet i pashpërndarë. Në Kuvend nuk është depozituar asnjë projektligj i ri për pronat që do të pasqyronte ndryshimet e kërkuara nga Gjykata Kushtetuese.
Atëherë, ku shkojnë këto para që nuk shpërndahen për pronarët? Viti 2021 rezultoi dështim total për procesin e kompensimit. Vetë Agjencia e Trajtimit të Pronave ka deklaruar në raportin 8-mujor se, gjatë këtij viti janë bërë kompensime vetëm për ato prona me kërkesë të veçantë. Kryesisht këto lloj kompensimesh janë më shumë në favor të qeverisë, sepse pronarit mund t’i bëjë me shpejt kompensimin, vetëm nëse pranon të marrë vetëm gjysmën e vlerës totale që i takon.
Nga ana tjetër Gjykata e Drejtave të Njeriut vazhdon të shtojë barrën për shtetin shqiptar, për shkak të padive të pronarëve.
