Prefekti i Gjirokastrës Astrit Aliaj kalon në “sitë” punën 6 mujore

Nën drejtimin e Prefektit të Qarkut Gjirokastër, Z. Astrit Aliaj u zhvillua ditën e sotme analiza 6-mujore e performancës dhe veprimtarisë së Institucionit të Prefektit të qarkut Gjirokastër për vitin 2020.
Çështjet kryesore që u trajtuan gjatë kësaj analize përfshinë kryesisht punën e realizuar dhe problematikat e evidentuara në këtë periudhë kohore. Më pas, përgjegjësat e sektorëve paraqitën në detaje të gjithë treguesit e punës bazuar në planet e punës mujore dhe vjetore të institucionit dhe objektivat e realizuara në zbatim të ligjit për Prefektin.
Në përfundim të analizës 6-mujore, Prefekti i qarkut vlerësoi punën e personelit në përmbushjen e detyrave të tyre, duke u shprehur se pavarësisht arritjeve të deritanishme dhe profesionalizmit të treguar në mbështetje të realizimit të misionit dhe detyrave të këtij institucioni, mbetet prioritet dhe domosdoshmëri realizimi i objektivave për muajt në vijim. U dhanë rekomandimet e duhura me qëllim përmirësimin e mëtejshëm të punës dhe performancës në çështjet, të cilat kërkojnë përkushtim dhe angazhim nga të gjithë sektorët e këtij institucioni.