Prefekti i qarkut Gjirokastër Z. Astrit Aliaj dorëzoi ditën e sotme certifikatë mirënjohje për Z. Shpëtim Novi, drejtor i Njësisë Vendore të Kujdesit Shëndetësor Gjirokastër, institucion që u angazhua maksimalisht gjatë situatës së krijuar në pikën e kalimit kufitar Kakavijë që solli fluks të shtetasve shqiptarë, si pasojë e zbatimit të masave të marra nga shteti fqinj grek për mbrojtjen nga Covid-19, si dhe për parandalimin e përhapjes së tij.
Prefekti falenderoi Z. Novi dhe të gjithë punonjësit e NJVKSH Gjirokastër për punën pa ndërprerje që po bëhet nga kjo strukturë që nga fillimi i pandemisë e deri më tani për gjurmimin dhe monitorimin e situatës epidemiologjike në qark si dhe vlerësoi për kujdesin shëndetësor të ofruar ndaj qytetarëve që qëndruan disa ditë përgjatë segmentit rrugor kombëtar Jergucat-PKK Kakavijë. Ndër të tjerash, Z. Aliaj theksoi se falë bashkëpunimit ndërinstitucional mund të arritet përballimi i situatave të ndryshme.
