Përfundon mbledhja: Rama, hapja e listave është angazhim

Pas diskutimeve disaorëshe në takimin e sotëm të Këshillit Politik për ndryshimet kushtetuese, ku i pranishëm ishte edhe kryeministri Edi Rama, ai u shpreh se diskutimi ishte pozitiv, por do të ketë sërish takime.
“Diskutimi ishte i gjatë, interesant. Ne nuk është se thamë ndonjë gjë të re, gjëra që ju i dini. Kemi një qëndrim shumë të qartë dhe ka një realitet politik, i cili imponon një qasje që për ne është e diktuar si forca më e madhe, por kemi edhe detyrimin të krijojmë një proces dhe të arrijmë në një rezultat, ku nëse të gjitha palët nuk janë 100% dakord, së paku secila nga palët të ketë pjesën e vet. Në këtë aspekt është e rëndësishme të diskutojmë.
Ne ishim gati të vazhdonim diskutimin pa ndërprerje, që nesër, por përfaqësuesit e opozitës jashtëparlamentare kërkuan kohë. Por ne kemi një kalendar që ka një kufij të caktuar që është fundi i këtij sesioni parlamentar.
Do të shikojmë në proces, por besoj se diskutimi ishte pozitiv. Hapja e listave nuk është variant, është angazhim. Ne dëshirojmë të përfshijmë qytetarët në procesin e përcaktimit të atij që nesër do të jetë grupi ynë parlamentar.
Duhet të çojmë deri në fund edhe angazhimin e nënshkruar deri më 5 qershor. Është një proces me dy korsi, ku stacioni është 30 korriku”, u shpreh Rama.