Përmes një reagimi të publikuar në faqen e saj në Facebook, Ambasada Amerikane ka vënë në dukje mbështetjen e saj për Punën e SPAK dhe Policisë së Shtetit duke e cilësuar atë të pavararur dhe profesionale. Por në qëndrimin e saj, Ambasada shprehet se këta profesionistë nuk duhet të kërcënohen apo kanosen, pavarësisht se cili është I pandehuri.
“Ambasada e SHBA-së mbështet me forcë punën e pavarur dhe profesionale të Policisë së Shtetit dhe SPAK-ut. Profesionistët e sistemit të drejtësisë – oficerët e policisë, prokurorët dhe gjykatësit – duhet të lejohen të bëjnë punën e tyre pa kërcënime dhe kanosje, pavarësisht kush është i pandehur. Ka ardhur koha që të lejohen të kryejnë detyrat e tyre dhe të mbështeten përpjekjet e tyre për të luftuar krimin e organizuar. Kjo është e vetmja mënyrë që shqiptarët të kenë sistemin profesional dhe të paanshëm të drejtësisë që meritojnë, dhe të ecin përpara drejt integrimit në BE”, thuhet në qëndrimin e Ambasadës.
Nuk dimë nëse zyra e diplomacisë amerikane ka informacione për kërcënime ndaj oficerëve të SPAK, por kujtojmë se ky reagim vjen në një moment, kur SPAK ka marrë disa vendime sekuestrosh mbi prona të emrave të njohur, së fundi edhe mbi hotel “Vollga” në pronësi të Emiljano Shullazit.
