Pas djathit të Ndraghet’a, Ardi Veliu merr dhe vulën e tenderëve në polici; fillon pazaret me 2.4 milionë Euro qira makinash
Duket abuziv ky tender i përsëritur në prag zgjedhjesh, kur policia e shtetit ka numër automjetesh aktive 10% mbi nevojat e çdo shërbimi, ndaj duhet hetuar fakti, se shumë nga këto mjete luksi që merren me qira, përdoren privatisht nga shefat e policisë, duke i maskuar me tendera për gjoja “nevoja emergjence të shërbimeve policore në terren”
Kryepolici Ardi Veliu, ka dhënë aq prova “shërbimesh” ndaj Bablokut, sa para 10 ditësh, i ka lënë në dorë tenderët e Policisë së Shtetit, të cilët prej 3 vitesh i bënte Agjencia e Blerjeve të Përqendruara në Ministrinë e Brendshme, duke ia hequr ministrit Çuçi.
Këtë kompetencë të re, kryepolici Veliu e ka nisur me tenderin e shpallur më 22 shkurt 2021, për marrje makinash me qira për policinë, me fond limit 248 milionë, 731 mijë e 200 lekë të reja pa TVSH, ose 2.4 milionë Euro me TVSH.
Sipas njoftimit zyrar, ky tender nuk do të bëhet nga Agjencia e Blerjeve të Përqendruara në Ministrinë Brendshme, por në zyrën e kryepolicit Ardi Veliu, nga një komision vlerësimi i krijuar prej tij.
Për ta bërë më bindës e justifikues si gjoja procedurë të hapur; njoftimi i tenderit është bërë dhe në anglisht, kur tenderi nuk është ofertë ndërkombëtare, por me operatorë brenda vendit, si çdo tender tjetër që i është dhënë Agron Papulit.
Në tre vitet e fundit, ky është tenderi i katërt, që bëhet për marrje makina me qira për policinë e shtetit; në vlera 1.7-2 milionë Euro, bërë nga Fatmir Xhafaj e Sandër Lleshaj, me afat deri në vitin 2024, ndërsa i njëjti tender i shpallur nga Ardi Veliu, është me afat deri në muajin maj 2025.
Çudia tjetër është kjo: makinat me qira që kërkon Ardi Veliu, duhet të jenë gati brenda 90 ditësh nga lidhja e kontratës, ndërkohë që vetë policia, ka në fuqi edhe tre kontrata për 267 makina me qira deri në muajin qershor 2022 e prill 2024, për të cilat janë paguar paradhënie 3.7 milionë Euro te 2 firmat e Papulit./Pamfleti
