Revoltë pas vrasjes së 25-vjeçarit/ Nis protesta e katërt, turma mblidhet në Bulevard.
TIRANË
Me thirrjet “Poshtë komunizmi!”, “Policia e krimit” ka nisur protesta e katërt, si revoltë e ardhur pas vrasjes së 25-vjeçarit Klodian Rasha nga një efektiv policie. Menjëherë pas grumbullimit të njerëzve të parë, policia është vënë në lëvizje.
Një grup të rinj kryesisht janë mbledhur pranë Kryesisë së Kuvendit. Policia është shpërndarë në proporcion me protestuesit për të mbajtur nën kontroll turmën.
Kjo është dita e katërt që protestohet në kryeqytet dhe gjatë ditëve të kaluara ka pasur efektivë dhe protestues të plagosur. Janë shoqëruar me dhjetëra protestues dhe janë proceduar qindra të tjerë. Protesta janë mbajtur dhe në disa qytete. Në Shkodër sot pas një marshimi në rrugët e qytetit, u dogj edhe selia e PS-së.
