NJË VATËR ZHULATI NË BORSHIN E BUKUR…
-Një vizitë në shtëpinë-resort të Artur Gjoçës, në Borsh-
Në Borsh ka vajtur qysh dhjetë vjeç.
Plot dyzetë e gjashtë vjet më parë ka lënë Zhulatin.
Një nga të shtatë fëmijët e Astrit Gjoçës, të katërtin në radhë, do ta merrte pas vehtes Shpresa, motra e madhe e cila u martua në fshatin e njohur faqe mali e karshi ujrave të Jonit.
Këtu u rrit Artur Gjoça, këtej shkoi ushtar, këtej e zgjodhi edhe njeriun e jetës, nënën e dy vajzave, Kozetën.
Aty, pak përmbi rrugën nacionale në dalje të Borshit drejt Sarandës, iu desh të blinin pak tokë ku ndërtuan një strehëz të vogël.
Më tej plot njëzetë e dy vite në emigracion në tokën helene nga ku, siç më thotë Arturi, do të punonte shumë për të siguruar të ardhura që strehëzën ta kthenin jo vetëm në një mjedis jetese por edhe në një resort të vogël turistik. Me ambiente të përshtatshme e bashkëkohore për turizëm, dyer hapur në të gjitha stinët.
Ka disa vite që tërësisht i është përkushtuar shërbimit ndaj turistëve e vizitorëve që zgjedhin të pushojnë ndanë ujrave joniane të Borshit.
Jo vetëm ndërtesa e banesës, gjithëshka në mjedisin rrotull është në shërbim të atraksionit turistik.
Një mjedis plot gjelbërim me lule, hardhi fantastike e pemë të tjera të ofron përherë një kënaqësi të hatashme njerëzore duke mbetur një aset i konsiderueshme në ofertën turistike familjare.
Kur shikon gjithë këtë farë gjelbërimi e veriget e rrushit që zverdhëllojnë, duket se ka marrë një copë të vendlindjes me vehte edhe pse Borshi, vendlindja e tij e dytë, shquhet për rritjen dhe prodhimin e agrumeve si askund tjetër.
Këtu rakia duket se pikon direkt nga bistakët kokërr shumtë që varen e krijojnë një dekor fantastik natyror.
Kështu Artur Gjoça, falë punës dhe përkushtimit të tij, me shumë dinjitet dhe krenari,
mban ndezur një vatër Zhulati aty, ndanë udhe, në Borsh.
Dhe plot mirësi e bujari rrënje, pret e përcjell vizitorë e turistë, vendas e të huaj.
Të bleroftë përherë e begatë jeta, Artur Gjoça, si gjelbërimi i pa sosur që të begaton avllinë.
Borsh, 16.08.2020
