EJ, Ç’PO NDODH…?!
Ka shumë ngjarje e lajme që po ndodhin e dëgjohen këto ditë, seicili e kushdo kërkon atë që mendon po edhe si e mendon të bëhet më mirë.
Përtej protestës në Tiranë një tjetër “protestë” jo e paktë vjen prej një emri jo pak të njohur e të dëgjuar në hapësirën mbarë shqiptare, madje dikur edhe president i shqiptarëve në anën tjetër të Drinit, Behxhet Pacolli.
Nuk kam ndonjë simpati kushedi personale por nuk ka si të mos më shqetësojë ajo ç’ka ai po artikulon publikisht këto ditë.
Madje ajo çka po shtron sot në një status të tij më duket alarmante.
Dhe nuk bëhet fjalë për ndonjë investim sido kudo, bëhet fjalë për Aeroportin e Vlorës, aeroport që shumë prej operatorëve turistikë vlonjatë po bëjnë dy vite që e konsiderojnë të hapur.
Se kështu u tha e për këtë u ul në pistë dhe avioni i parë.
Jam dëshmimtar se si disa prej këtyre operatorëve, pas lidhjes së kontratave, festuan edhe rezervimin e parë akomodues me turistë prej vendeve të ndryshme të Europës.
Ndërkohë që ajo që Bexhet Pacolli si një prej investitorëve e ndërtuesve trajton në deklaratën e tij është alarmante, shokuese.
Po si ka mundësi që ky shtet të arrijë në këtë pikë ku të mos jetë në gjendje, në mënyrën më të drejtë e ligjore, të mos e ndajë kush e ka përgjegjësinë e bllokimit.
Si ka mundësi që në këtë vend e ashtu quajtura DREJTËSI, të mos e ndajë dot “shapin nga sheqeri”…kur edhe “shapi” po edhe “sheqeri” përmes dokumentash janë në dritën e Diellit ?!!!
Ndërkohë që vlonjatët e shqiptarët po presin funksionimin normal të Aeroportit zallamahia rreth tij po bëhet e frikshme.
Ore, a ka ndonjë të mençur për të marrë në këtë Mëmëdheun tonë për ti ndarë ca gjëra apo si është kjo punë…?!
