Siç duket edhe nga pamjet, dielli i mëngjesit e ka të pamundur të prekë çatitë dhe dritaret e shtëpive të Gjirokastrës së poshtme të ish zonës industriale, Zinxhirave, ish SMT, Lagjes Punëtore, por edhe një pjese të mirë të Luginës së Drinos dhe tu thotë mirmëngjes banorëve të atyshëm.
Arsyeja që ndodh kjo, është smogu i shumtë që akumulohet gjatë natës nga djegia e plehrave dhe mbetjeve të tjera në zonën midis dy varezave të qytetit buzë lumit Drino.
Rilindja dhe kryetarët e bashkive të saj kanë premtuar në çdo fushatë elektorale ndërtimin e një landfilldi për përpunimin e mbetjeve, por deri tani asgjë nuk është bërë.
Edhe pse Flamurët janë ngritur e janë ulur duke i lënë vendin njëri-tjetrit në karrigen e kryetarit të Bashkisë, edhe pse ne në këshillin bashkiak i kemi dhënë viston një plan studimi dhe ndërtimi të një landfilldi rajonal, helmi i çliruar gjatë natës nga djegiet e pakontrolluara apo të qëllimshme të mbetjeve po rrezikon seriozisht jetën e qytetarëve të Gjirokastrës dhe fshateave përreth.
Numri i vdekjeve për shkak të sëmundjeve kanceroze është rritur shumë vitet e fundit në këtë zonë. Dhe sipas mjekëve cilësia e keqe e ajrit dhe e ushqimit veç të tjerash janë dy nga shkaqet kryesore të këtij fenomeni.
Ndërtimi i landfilldit për trajtimin e mbetjeve jo vetëm për qytetin e Gjirokastrës, por për gjithë Qarkun po mbetet si një sfidë e madhe për qeverinë e re demokratike që pritet të vijë së shpejti si një mundësi e re për gjithë shqiptarët pa dallim.
