Një sherr banal mes dy të moshuarve përfundoi me një të vdekur në një azil privat në lagjen “Ali Demi”, në Tiranë, orët e para të mëngjesit.
Policia njoftoi më herët se 78-vjeçari Zyhdi Shehi goditi me bastun në kokë Virxhil Veshon duke e lënë të vdekur në vend. Viktima, 82 vjeç dhe autori ishin konfliktuar më herët për çështjen e krevatit, sipas burimeve policore.
Punonjës së azilit privat “Ruaje Moshën” ku ndodhi ngjarja, kanë dëshmuar se të dy të moshuarit vuanin nga skleroza.
Autori është një emër i njohur në qytetin e Kavajës. Shehi ka disa publikime në fushën e historisë, madje vitin e kaluar është shpallur edhe “Qytetar Nderi” i Kavajës.
Sipas biografisë së botuar edhe online, Zyhdi Shehi është diplomuar në Institutin Pedagogjik të Shkodrës për Gjuhë-Letërsi e më pas ka mbaruar me korespondencë edhe Fakultetin Filologjik të Tiranës, po për Gjuhë-Letërsi.
Pas një periudhe pune si mësues, në vitin 1982, nis punën në Muzeun Historik të Kavajës. Në vitin 1996, pas botimeve të artikujve të shumtë në fushën e historisë dhe etnografisë së zonës, del me librin e parë, monografinë kushtuar patriotit kavajas, Ahmet Bejtaga.
Më pas, në vitin 2000, monografinë Andrea Ekonomi, “Mësues i Popullit”, “Kavaja, figura të shquara historike” 2005, “Indrit Cara”, 2007, “Inxhinjeri Jani (Xhuf) Koljaka, e Diplomati Stavro Stavri”, etj. Për merita në punë i është dektretuar në vitin 1990 edhe medalja “Naim Frashëri”.
