“Marigonën e vramë ne”…
Nga: Nezir Kraki
Marigonën e vramë ne…
Ne, shoqëria klienteliste që mbajtëm në pushtet për 20 vite, dhunues të dinjitetit kolektiv dhe shkatërrues të çdo ëndrre për jetë normale.
Për 20 vite rresht ne ishim karburanti i asaj makinerie çnjerëzuese që s’la hallkë morale pa thyer duke i lënë 2 milionë njerëz «n’dorë t’Zotit».
Ne e vramë Marigonën sikur kemi vrarë deri sot Marigona të tjera, skutave të dështimit tonë kolektiv. 20 vite lejuam që shteti të jenë ata e populli ne, në jetesë paralele, duke shikuar e numëruar milionat e tyre nga dritarja jonë e mizerjes dhe e dëshpërimit.
Si do të sillej Marigona në një sistem të tillë? Si do të mbrohej ajo? Kush do ta mbronte atë nga brutaliteti i jetës pa shpresë i cili e çoi tek një bishë pa ndjesi njerezore?!
Gjithë ato vajza e gra që s’kanë as kujt t’i flasin per tmerret e tyre sot ndihen edhe më të liga, edhe më të pambrojtura sepse sistemi që ne e lejuam për 20 vite e tradhtoi secilën nga to, sa herë ato paten nevojë për të.
Ne e vramë Marigonën, sepse kemi 20 vite që glorifikojmë banditë e injorantë duke i ngritur në modele suksesi dhe duke i mediatizuar çdo natë në mediat – bashkautore të këtij krimi.
