Nuk është faji i modelit Z.Braçe jo….
Dëgjova një monolog-denoncues të deputetit Erjon Braçe, në faqen e tij në rrjetet sociale, lidhur me problemin e tregut të prodhimeve bujqësore, drithrave në këtë rast. Fshatarët prodhojnë grurë e nuk e shesin dot, sepse çmimi është më i ulët sesa kostoja. Për këtë arsye ata po mbjellin gjithnjë e më pak.
Z.Braçe i referohet “modelit të keq të tregut”, dhe flet për një tregtar të madh që u shet fermerëve farërat, plehrat, pesticidet dhe pastaj sjell anije më grurë, shumë grurë, nga Rusia e Ukraina. Ky kontrollon shitjen e farës, importin e grurit, bluarjen e tij, shitjen e miellit dhe çmimin e bukës që nuk ulet kurrë etj etj.…
Nëse është kështu, nuk mendoj se është faji i modelit të tregut, por është i Monopolit në treg. Këtu duhet të hyjë qeveria dhe institucionet e shtetit. Ndaj janë qeveritë, për të vendosur rregulla. Që një njeri të mos ketë edhe gurin edhe arrën.
A nuk e shkatërruam në këtë mënyrë kultivimin e duhanit, qeveri pas qeverie? A nuk ia lamë një kompanie të vetme të drejtën të shiste farën e tu blinte prodhimin fshatarëve? E çfarë bënte kjo? Ua blinte duhanin sa t’ia donte qejfi. Më lirë një kg duhan se një paketë cigare. Çfarë ndodhi? Kultura që në komunizëm vinte pas kromit, për eksportet, u degradua në shifrat e vitit 1930. Dhe shumica e fshatarëve shqiptarë punojnë sot në zonat më të mëdha duhan kultivuese të Greqisë.
Tani e ka radhën gruri. Jemi në shifrat e vitit 1945. Shumë shpejt do të shkojmë në shifrat e 1924, kur gruri shihej me kuaj.
Z.Braçe është i vetmi që “guxon” të flasë brenda mazhorancës për këto punë. E dëgjova një herë në parlament të thoshte: Si do të shkoj unë ti kërkoj votën fshatarëve sërish, kam unë sy e faqe ti kërkoj votën?
Në fakt, detyra juaj nuk është të flisni mirë, apo të bëni mirë punën tuaj që të keni “sy e faqe“ tu kërkoni fshatarëve(dhe jo vetëm) sërish votën. Ju duhet ta bëni mirë atë punë, se për atë jeni zgjedhur e për atë paguheni.
Sa për “sytë dhe faqet”, unë nuk e di vërtet si do tu shkoni fshatarëve tu kërkoni votën, pasi të gjithë e kanë marrë vesh që paratë e BE-së për stallat e lopëve, serat, vreshtat, punishtet e verës, vajit të ullirit, traktorët etj, ata që i menaxhonin ia dhanë njëri-tjetrit. U bënë me ato para edhe vila me pishina, disa i shtuan nga një kat sarajeve, disa bënë shtëpi në fshat me gurë e oxhak(modë hesapi, duhet edhe kjo).
Javën e kaluar Serbia i rriti sërish subvencionet në bujqësi e blegtori, dhe kjo do të bëjë që prodhimet serbe të vijnë edhe më lirë në tregun tonë, duke mbyllur edhe më shumë stalla lopësh këtu.
