Shqipëria të shpallë të padëshirueshëm antishqiptarët!
Shteti shqiptar duhet ta shpallë të padëshirueshme “non grata” jo vetëm ministren serbe të Administratës dhe Vetëqeverisjes Lokale në Serbi, Snezana Paunoviç, por edhe ZvKryeministrin e Serbisë, Ivica Daçiç, i cili i doli në mbrojtje, duke thelluar e mbështetur pohimet ekstreme të saj.
Deklaratat e Paunoviç se shqiptarët në Kosovë, në vitin 1998, duhet të ishin spastruar etnikisht në formë të plotë, janë dëshmi e një antishqiptarizmi që vijon të kultivohet fort në qarqet politike nacionaliste serbe, një antishqiptarizëm që ushqehet me urrejtje dhe ekstremizëm.
Këto qëndrime mbeshteti edhe Daçiç duke mbrojtur nga reagimet ndërkombëtare, ministren Paunoviç. Sipas tij është normale të kërkohej largimi i shqiptarëve në vendin e tyre të origjinës, në Shqipëri. Pra numëri 2 i Qeverisë Serbe, Daçiç, i quan shqiptarët të ardhur në Kosovë… Dikush duhet ti kujtojë këtyre antishqiptarëve, se kur u dukën në këto territore me gjethe në vend të rrobave, ilirët kishin qytete të mëdha, kishin zhvillim, kishin qendra, kishin perandorë… Shqiptarët janë autoktonë në Dardani e kudo dhe këtë nuk e zhbën dot asnjë pasues ekstrem i kasapit gjakatar Millosheviç!
Në fakt askush nuk habitet, sepse qëndrimet e tyre njihen, por reagimi duhet të jetë i qartë dhe i menjëhershëm.
Nëse qarqet më të larta ndërkombëtare reaguan ashpër ndaj këtyre deklaratave, autoritetet tona duhet jo vetëm të reagojnë, por edhe ta shpallin të padëshirueshëm të dy këta antishqiptarë.
Jo vetëm sepse deklaratat e tyre janë kriminale, por edhe sepse ata njerëz që u vranë në Kosovë janë gjaku ynë: motrat, vëllezërit, nënat e baballarët, gjyshërit e gjyshet tona. Janë gjaku ynë shqiptar.
Diplomacia ka vlerën e saj, por vetëm deri në një pikë. Kur shkelet vija e kuqe, vjen momenti i vendimeve.
Nuk i hapet rrugë pafund, as Serbisë, as Greqisë. Boll! Ne jemi në trojet tona prej kohëve më të lashta dhe nuk mund të ulim kokën pafundësisht përballë padrejtësive apo pretendimeve të askujt. Nuk mundet të pranojmë gjithçka! Marrëdhëniet ndërtohet mbi reciprocitetin, jo mbi nënshtrimin. Pavarësisht se nga cili krah vijnë sfidat, dinjiteti dhe interesi kombëtar duhet të mbrohen.
