Ditën e djeshme më datë 22 Tetor u mbajt edicioni i parë Festivalit “Mikrofoni i artë Vace Zela”, një event i cili u mbajt në Lushnjë dhe i organizuar nga shoqata ne ndihmë të grupeve vunerabël nën drejtimin e Adriatik Gega me mbështetjen e Bashkisë Lushnje. Ky edicion qe i organizuar në mënyrë të tillë, ku të gjithë të pranishmit ndjenë vlerën e bukur të të qënit shqiptar teksa ndiqnin fëmijët pjesëmarrës të këndonin këngët e së madhes Vace Zela, arti i së cilës trashëgohet brez pas brezi.
Fëmijët morën pjesë në këtë festival me këngë kryesisht të ikonës së muzikës dhe c’ka është më e rëndësishmja, kënduan live, duke sfiduar veten edhe pse në moshë tepër të vogël dhe duke mposhtur emocionet para jurisë dhe një publiku të gjërë që ishte sy e veshë tek ta. Juria përbëhej nga pesë anëtarë, ikona e kinematografise Margarita Xhepa, mjeshtri i muzikës Zhani Ciko, soprano Mariana Leka, aktori Antonjo Gjonaj dhe gazetarja Sava Lena. Cmimet e para ishin mëse të merituara dhe u fituan nga Fjona Resuli (Çmimi i parë), Marina Dako (Çmimi i dytë), Arbias Pepa (Çmimi i tretë). Po ashtu u fituan edhe disa çmime të tjera speciale.
Gjatë këtij eventi ishte pjesë edhe Irma Radhiqi, vajza e “Mbretëreshës” së muzikës së lehtë shqiptare Vace Zela. Po ashtu kishte pjesëmarrës nga komunitetet fetare, artistë nga të gjitha trevat shqipfolëse. Z. Gega theksoi ndër të tjera se “Mikrofoni i artë Vace Zela” do kthehet në një eveniment të rëndësishëm të përvitshëm dhe në një dritare për të evidentuar fëmijë të talentuar në muzikë, gjë e cila i kishte munguar deri më tani qytetit të Lushnjes.
