Kolegu, miku dhe kumbari im gjakovar KASTRIOT SHEHDADI, sot u nda nga jeta.
Ti ike sot, por na le mbrapa një humnerë me dhimbje, me lot, me pikëllim.
Ike, në mënyrë të shpejtë, të parakohëshme, të pamerituar, të pazëvendësueshme, sepse prej sot do të mungosh për të gjithë: për nënë Hajrien, për fëmijët e ty Donatin, Gertin dhe Nositin, për Atlantidën, për Lekën, për motrat e tua, për ata dhjetra miq, shokë e kolegë: në Gjakovë, Prishtinë, Tiranë dhe më shumë akoma në Gjirokastër.
Për ty, sot pikon veç lot. Sepse nuk do të të shohim më, as në Gjakovë, as në Gjirokastër. Na ike dhe shkove, ashtu sikur ikin më të mirët e kësaj Bote. Përse vetëm për ty të ndodh e gjitha kjo? Përse, ne nuk mundemi pa ty!Habitëm, një ditë më parë më the se ndiheshe shumë mirë pas ndërhyrjes që bëre para një jave në spitalin e Prishtinës?! Si ikë kështu? Nuk mund të besoj asgjë!
Për kolegët e medias në Prishtinë, në Gjakovë, në Tiranë dhe këtu në Gjirokastrën tënde, ti do të mbetësh gjithmon i gjallë, do të kujtohesh, për atë urtësinë në shkrimet e tua, për drejtësinë, për paanësinë, për realizmin, për pastërtinë dhe dashurinë kë manifestoje për prosperitetin e Kosovës dhe Shqipërisë.
E di, në memorjen e kompjuerit tënd “flejnë” disa projekte botimi, në proces apo dhe disa të përfunduara, për të cilat ti ke punuar aq shumë. Ndoshta monografia për atdhetarin Zekeria Canën, do të arrijë të botohet nga miqtë e tut ë shumtë. Për kolegët e Gjirokastrës, ti KASTRIOT do të mbetësh i paharruar, për atë kontribut të madh që dhe me çeljen e radios “Zëri i Kosovës”. Zëri yt i ëmbël përcolli dhjetra mesazhe që ngrohën zemrat e kallura të kosovarëve që u vendosën në Jug të Shqipërisë në ato ditë të vështira. Zëri yt, bashkoi me dhjetra familje të shpërnara anëekënd në atë atmosfërë të dhimbshme ikjeje nga trojet stergjysore.
Do të kujtohesh vëlla, se e meriton plotësisht dashurinë dhe respektin dhe çdo vlerësim tjetër që sot është transformuar në lot dhe shimbje pa fund për ty, i miri KASTRIOT.
Udhëtim të qetë të uroj për në Parajsë.
Dheu të qoftë i ëmbël si mjalta.
U prehsh në Paqe, kolegu dhe kumbari im i dashur.
Nuk do të të harroj dot kurrë.
Lamtumirë, i miri i më të mirëve KASTRIOT SHEHDADI.
Gjirokastër, 25 Gusht 2020.
