Edi Rama, një narcist “i dashuruar” thellë me veten.
Nga ekspozita personale në Stamboll dhe takimi me presidentin Erdogan, tek shpërndarja e legalizimeve në Roskovec…, këto janë daljet publike të dy ditëve të fundit të kryeministrit Edi Rama. Ai shfaqet njëkohësisht si artist, si politikan në rangun e “lidërve globalë” siç i thoshte me gjësendi, kryeministri serb, Vuçiç dhe njëkohësisht në kostumin e udhëheqësit lokal që mund t’u japë zgjidhje halleve të popullit. Mania për protagonizëm e bën Edi Ramën të dalë nëpër ekranet televizive sa nga një cep i vendit, në ndonjë qoshe të botës.
Ai është figura që zë hapësirën më të madhe kohore nëpër televizione, me fjalime të gjata sa moraliste aq edhe kërcënuese “për ata që nuk zbatojnë ligjin” apo ndonjë media kritike.
Nëpër botë po shëtit së fundmi me ekspozitën personale të punimeve që ka bërë duke zhgarravitur në bllokun e shënimeve, kur takonte njerëz në zyrë.
Me këtë qasje, si i ndryshëm mes të barabartëve, ai po synon të tërheqë vëmendjen e të huajve. I ndryshëm, sepse nuk i pëlqen t’i heqin shenjën e barazisë me të tjerët. Ekspozitat pompoze janë një rast i mirë për këtë qëllim. Deri tani, vlerësime ka vetëm për pompozitetin me të cilin ai i organizon. Për pikturat nuk ka të dhëna se pëlqehen. Në takimet me liderë të huaj, ai përpiqet gjithnjë të dallohet . Kur nuk ka ekspozitë me vete, e tërheq vëmendjen nga vetja me batuta. Ai ishte “gaztori” në samitin e liderëve të Ballkanit që u mbajt nën kujdesin e kancelares Merkel. Për këtë u dallua. Kryeministrit të Shqipërisë i pëlqen të përflitet edhe për veshjen ekstravagante. Në disa takime në Kinë u shfaq një vit më parë me pantallona linoje. Në takimet zyrtare i pëlqen ta tërheqë vëmendjen me kravatat ekstravagante, plot fantazi e shumë të kushtueshme. E gjithë kjo i shërben qëllimit për të qenë me çdo kusht në qendër të vëmendjes. Ai duket i dashuruar thellë me veten. Nuk është i shtirur kur mendon se është piktor apo politikan i arrirë, apo edhe që vishet më me shije se të tjerët e rangut të tij.
Aq i dashuruar është pas vetes, saqë emrin e tij të shkruar me gërma të mëdha me ngjyra, të vendosur në murin e galerisë ku hapi ekspozitën në Stamboll, e ka vënë si “cover” në facebook. Një tjetër foto ku spikat emri i tij e ka titulluar si “Photo of the day”. ”Vetë ai paraqitet duke ecur kokëlartë poshtë emrit të shkruar me të madhe, si t’i kishte të gjitha punët në terezi“, siç i shkruan një nga ndjekësit në Facebook. Personalisht, kështu mund t’i ketë punët. Sidoqoftë, s’ka dyshim që atij i shijon vetja.
