23 kryebashkiakë në 112 vite në Elbasan
Kryebashkiaku aktual i Elbasanit, Gledian Llatja, është një prej atyre kryebashkiakëve të 112 viteve qeverisjeje të qytetit të Elbasanit.
Ai është në vazhdim të mandatit të parë të drejtimit të një prej Bashkive më të rëndësishme të Shqipërisë. 40-vjeçari Llatja, ndër më të rinjtë, ndër dhjetra kryebashkiakët, që e kanë drejtuar këtë qytet që nga viti 1908. Kohë kjo, kur Emin Haxhiademi (Shijaku), merrte frenat e drejtimit të kryeqendrës së Shqipërisë së Mesme për tu pasuar nga figura të tjera të rëndësishme si Fuat Biçaku, Kasem Sejdini, Lef Nosi, Hasan Biçaku, Ahmet Dakli e të tjerë.
Institucioni i Bashkisë së Elbasanit nga 1908 vijoi deri në 1943, kur u “shpërbë” për shkak të Luftës së Dytë Botërore dhe më pas gjatë sundimit komunist, nuk u rijetëzua dot më, për të rinisur në Epokën e Demokracisë, me nipin e kryebashkiakut të parë të Elbasanit, Emin Haxhiademi. ( i riu)
Pas tij, elbasanasit zgjodhën inxhinierin Engjëll Dakli si kryebashkiak, i cili e drejtoi Bashkinë e Elbasanit në periudhën 1996 – 2000. Edhe Dakli mbetet një emër i përsëritur, si nipi i Ahmet Daklit, që ka qeverisur përgjatë viteve 1916 – 1917 dhe 1937 – 1939. Engjëll Dakli, si i dyti demokrat i pushtetit vendor në Elbasan, do të pasohej nga i pari socialist, Hysen Domi, gjatë periudhës 2000 – 2003.
Katër vjet më pas, elbasanasit zgjodhën Ardian Turkun, përfaqësues të PD-së, një intelektual me vlera përtej këtij qyteti, i cili garoi për herë të dytë në këtë post nga i njëjti subjekt politik në zgjedhjet e 21 qershorit të vitit 2015. Por, më jetëgjati mbetet Qazim Sejdini, një figurë sa karizmatike aq dhe popullore, që drejtoi këtë qytet për tre mandate, i propozuar nga socialistët. Por, ndërsa Sejdini e mbylli mandatin e tij të tretë, ai mbetet një emër potencial në historinë mbi shekullore të qeverisjes vendore në Elbasan e përtej tij. PS prej kohësh kërkonte një pasardhës dinjitoz pas Sejdinit. Ai ishte i riu Gledian Llatja, që “provën” e parë e dha për disa muaj si prefekt i Elbasanit. Gjithsesi nuk mungojnë as kritikët e tij, pasi qyteti ka ende probleme serioze në shumë aspekte. Ndërkohë Sejdini është futur në historinë e qeverisjes së Elbasanit si kryebashkiaku më jetëgjatë dhe vlerësime e kritika për të ka patur e do ketë. Ndërsa, Sejdini e ka deklaruar që misionin e tij si kryebashkiak gjykon se e mbylli me sukses dhe se për këtë është krenar para gjithkujt. Ajo, ç’ka bie në sy, mbetet se mes dy forcave më të mëdha politike, PS dhe PD, pushteti vendor është i ndarë përgjysëm në këto 30 vitet e demokracisë. Tre kryebashkiakë kanë qenë të PD-së dhe tre të PS-së.
Tashmë, stafetën e kryeqytetarit elbasanas, e ka në dorë Gledian Llatja, kryebashkiaku më i ri, me frymë të re e vizioin të ri…
KRYEBASHKIAKËT NDËR VITE
Emin Haxhiademi- 1908
Alush Saraçi 1912–1913
Fuat Biçaku 1913–1915
Hysen Hostopalli 1915-1916
Xhaferr Dardha (s’ka vit të datuar)
Tajar Tetova (s’ka vit të datuar)
Kasem Sejdini 1919 – 1924
Lef Nosi 1924 – 1925
Benexhet Hydi (s’ka vit të datuar)
Nazef Basha 1928 – 1929
Rustem Ymeri 1929 – 1930
Abdyl Dilaveri 1930 – 1933
Hasan Biçaku 1933 – 1934
Ahmet Dakli 1916 – 1917 dhe 1937 – 1939
Qemal Karosmani 1939
Ymer Saraçi 1939 – 1942
Refik Bekteshi 1942 – 1943
Pushteti komunist 1944 – 1990
Emin Haxhiademi 1992 – 1995
Engjëll Dakli 1996 – 2000
Hysen Domi 2000 – 2003
Ardian Turku 2003 – 2007
Qazim Sejdini 2007 – 2019
Gledian Llatja 2019 e në vazhdim…
