Nga Basir Çollaku/ Rama po rrëzohet dhe nga erionistët, gjushistët, pushtuesit e rinj zdromistë në PS…

Rama, me kandidimin në Durrës, tek vëlla Gjushi, ia dorëzoi Rilindjen Niçes, sojit që ia kishin gatuar… Kjo është një mundësi t’u kthejë PS-në socialistëve, pa mjaftistë, e erionistë, gjushistë. Ka mëse dy vjet, ndoshta më tepër, kohë kur është konturuar përplasja e ashpër brenda të majtëve. Pasi Veliaj u bë kryebashkiak, në zgjedhjet e 2017 punonjësit e Bashkisë nëpër zyrat elektorale nuk pyesnin të dërguarit partiakë të qeverisë. Karshillëkun e flisnin me ton hapur. Erionistët, ose ndryshe zdromistët, mbinë në PS nga kafshimi i egër i pushtetit dhe parasë. Asgjësimi narkopolitik i Sajmir Tahirit, la korsinë e hapur për zdromistët bashkiakë në Partinë Socialiste. Edi Rama e humbi kontrollin autokrat brenda të vetëve. Sajoi një kongres partie për promovim të Lindës, duke i dërguar shenjë Veliajt, se testamenti për pasardhësin po ndryshon rrugës. Në shtator e më pas, nëntor 2019 përplasja prodhoi qortimin rrëshkitës të Ramës. “Merr kovë e gëlqere lyej gardhin”. Kjo, pasi Veliaj kishte humbur terren frikshëm në qershorin zgjedhor, ku votimi njëemror ishte shkatërrues. Për të bërë teveqelin e fortë, Rama i lëshoi pataten përvëluese, shembjen e Teatrit. Pëshpëritje socialiste thonë se Rama urdhëroi vartësin me kuota të rëna, nëse nuk e shembte për tre ditë do ta dërgonte vetë në SPAK. Presioni u bë shteg. Zdromisti e shembi duke bërë ngjarje dhune dhe shokuar vendas e të huaj, e shembi. Prokuroria, falë zdromistëve brenda saj bën xhiro bosh me një pamundësi të frikshme në kryerjen e detyrës për ngjarje flagrante. Dosja rrezikon ti ngjitet asaj të vrasjes së të miturit Gjoklaj, ku kasaphana hetimore u dirigjua nga fajtoret. Erionistët zdromistë tashmë nuk pyesin. Hollë-hollë nuk u kërcet në sinoret e tyre për ramistët, agaçistet. Të. ndihmuar nga Xhafa e të tjera fije të së shkuarës, kryezdromisti i kryeqytetit, po rreket të rrethojë karriken e Edi Ramës dhe ta sulmojëm, sapo ai të lëvizë të ndenjurat prej saj. Aksionet tek Soros i hollohen njërit e i trashen tjetrit, pa konsoliduar garën e fituesit. Palët mbajnë njërin sy hapur, për të marrë vesh nga do hedhë hapin mbajtësi i hipotekës, Ruçi. Ai di të shesë. Siç bëri me Nanon, mund ta bëjë me pasardhësin dhe kandidatin. Marketi nuk është mbyllur. Zdromisti ka futur në oborrin e tij shumë pallatistë, duke shërbyer si berber i portofolit të shumëkatëshve. Mbi 600 leje ndërtimi, duke marrë kutin matës të Ramës, 20 përqindëshi eshtë fryrë më fort. Tabela e shumëzimit prodhon qindra miliona euro. Tabela e Prokurorisë vuan nga një anemi e theksuar, me simptoma të rënda vettingu. Nëpërmejt Xhafës, rreshtuar përballë Ramës nga ikja prej Geronit, për të mos prangosur Gjushin, Veliaj ka hyrë në sitemin e drejtësisë me zdromistët e tij, njëherësh duke mbajtur në shenjestër ndonjë guximtar që heton dosjet e shumta bashkiake në Prokurori. Këtu është shfaqur efekti Xhafa, me katapultim sigurimsash në krye të institucioneve të reja të drejtësisë. Kontrolli anon nga zdromistët bashkiakë, prodhuar egërsisht nga ndikimi i Xhafës, dhëndrrin e të cilit, Veliaj e mban në zyrën e lejedhënies së pallateve pa fund. Pse Rama u afrua në Durrës, ndërsa Tiranën e copëzoi në tre drejtues duke lënë Veliajn si njëri prej tyre?? Në Vlorë sherri me Lelin, orekset në Palasë, mëritë e vjetra të Koços, babëzia personale, ia hoqën ndenjësen e rehatit dhe e bënë të thërriste taksistin për konsultë. Betejën me opozitën, Rama e ka marrë vesh se e ka humbur, e s’ka marifet t’ia shpëtojë davanë. Përpjekjen e ashpër e kanë si rilindasit e tij, që të dalin mbi zdromistët erionistë. Kjo do të jetë përballja nga ku humbësi do të jetë shenjestër ndëshkimi për kundërshtarët, ndërkombëtarët, duke zbukuruar në krye statistikat e SPAK..Këtu, Rama është rreshtuar te gjushistët, si streha e fundit e përpëlitjes dhe si përdorje e tyre në përplasje me zdromistët erionistë. Kështu, furtuna e interesave ka lënë jashtë vëmendjes socialistët, të lënë krejt pas dore. Do lëkunden pas rilindjes. do përkunden si ramistë edhe disa muaj e do të përfundojnë si erionistë dhe zdromistë apo do t’u kërcasin një shkelm në fundshpinë të dy palëve që kanë bërë shumë punë me të, paskëtaj do të kthehen të jenë socialistë. Kjo alternativë u bën mirë atyre njëherësh edhe vendit…