Berisha i primareve mban PD larg pazareve
Sali Berisha është një prodhues politik i pakonkurueshëm. Rëniet dhe ngritjet janë raste studimi. Partia Demokratike e sulmuar brutalisht nga Edi Rama, qeveria dhe aleatët e saj të zinj dhe gri, i rezistoi planit të asgjësimi me një mbijetesë të pazakontë.
Berisha i dha fuqinë e munguar votës së anëtarit. Kryetari, krerët e degëve, përfaqësuesit e drejtuesit e forumeve marrin detyrën nga kutia e votimit. Vërtet nuk ishte formulë e zbatuar në udhë perfekte, por ishin më të mirat e deritanishme. Korrigjimet janë të nevojshme.
Jemi më pak se shtatë muaj nga zgjedhjet parlamentare. Vendimet e Gjykatës Kushtetuese me hapjen e listave në 2/3 dhe mbylljen në 1/3 ka shkaktuar luhatje. Demokratët besojnë te kryetari Berisha. 500 mijë vota pa zyra, pa logo, pa asgjë e dëshmuan këtë. Por nuk duan të heqin dorë nga oferta e tij, premtimi i tij, praninë e tyre në fuqinë e re partiake, PRIMARET. Kjo do të prodhonte jo pak zhgënjim të brendshëm.
Një garë e konkurrentëve brenda anëtarësisë mund të përcaktojë shkallaren si në rendin e sigurtë dhe atë preferencial.
Kryesia, Këshilli Kombëtar, debatet në prag fushate duhet të kenë prioritete cilësore. Është nevojë urgjente e një zhvillimi strukturor.
1-Të krijohet një grup pune për përcaktimin e modaliteteve të primareve, me eksperiencat më të mira, kryesisht ato amerikane. Të jenë primare të mbyllura se dalja jashtë partisë, në kujtesën e 2023 u hapi rrugë majtistëve të përfshihen si simpatizantë.
2-Të hiqet dorë nga orientimi i votës nga qendra, kryesia dhe funksionarët drejtues.
3-Të mos ndikojnë në orientim kryetarët e degëve. Në statutin e 11 dhjetorit 2021, është përcaktuar se, kandidimi i tyre sjell dorëheqjen, por edhe me një status të tillë, pasja e listave dhe ndikimi e kompromenton
4-Listat të mos jenë vetëm në duar krerësh të degëve, të cilët mund të çorientojnë atë në momente të fundit të votimeve.
5-Të mos ketë balotazh, pasi në përvojën e mëparshme nuk solli shëndet të brendshëm politik.
6-Komisioni Qendror i primareve të ketë personalitete të partisë me integritet dhe moral të spikatur, jo anëtarë kryesie, të jenë jashtë konfliktit të interesit si kandidues në gara. Të jenë filtër statutor dhe moral.
Kryetarët e degëve në angazhimin e tyre sakrifikues, duhet të kenë objektiv parësor nxjerrjen e partisë fituese nga zgjedhjet. Këtu, spikatja e tyre sot i ul me të drejtë në tryzën e pushtetit nesër. PD ka model funksionues. Primaret duhet të shërbejnë edhe për zgjedhjen e drejtuesve politikë të qarqeve. Asnjë deputet apo kërkues nuk duhet të trembet nga vota. Megjithë aksiomën e njohur se politika është ndër të tjera art marrëveshjeje, brenda subjektit marrëveshja prevaluese është Kushtetuta e Re e PD, PRIMARET. Deputetët e rikthyer nuk mund të shpresojnë “bonusin Berisha” në lista dhe pastaj të mbeten me shpresë se anëtarësia do të amnistojë pakënaqësinë përfituesve. Vetëshpallja si deputet i rëndësisë së veçantë nuk duhet të vlejë për askënd. Asnjërin. Kandidatët nuk duhet të ikin nga një zonë në tjetrën, për t’iu shmangur llogaridhënies së mandatve të konsumuara e harresës mes datave elektorale. Këtu mjaft mandat-mbajtës sqarojnë veten dhe demokratët nëse janë rikthyer te Berisha apo “berishizmi” si rezervat votash. Mungesa e votës, zgjedhja me delegim, nis firot në votimet parlamentare. Mund të sjellë hapur demotivim. Qëndrim larg pjesëmarrjes. Nëse demokratët duan të mbështesin dikë apo mospëlqejnë dikë tjetër, kjo mundësi duhet t’u jepet, sepse ata janë makina elektorale e partisë, njëherësh, ndezësit e frymës. Sigurisht në këtë krizë të moskonsolidimit pa dalë tej anëtarësisë, ku edhe në zgjedhjet e kandidatëve bashkiakë në 2023, u zgjatën duar socialiste, si simpatizantë të orëve të fundit. PD ka potenciale të mëdha. Mundet ta thellojë këtë leksion demokracie, pavarësisht pjekurisë delikate të procesit. Fuqia e Votës nuk mund të tregohet me turne. Nëse e shmang në përzgjedhjen e përfaqësuesve, të bjerret mundësia ta kërkosh në raundin final, ku pret t’i bësh ata fitues përballë kundërshtarëve. Ky aksion politik i nisur tri vjet më parë me rithemelimin, ardhur me Berishën e Primareve, duhet të jetë garanci sot për ta mbajtur PD larg pazareve.
