7 gjëra të vogla nga ku duhet të nisë revulucioni i dytë berishist për votën e lirë
Pas një humbje apo disfatash të njëpasnjëshme, reflektimi apo faza tjetër revulucionare, ndoshta duhet të nisë nga disa gjëra të vogla dhe të pabesueshme, në dukje të parëndësishme, por që të gjitha së bashku mund të diktojnë një tjetër fat në betejat e ardhshme.
-Në faqen zyrtare të PD-së emrin i Enno Bozdos duhet korrigjuar dhe shkruar ‘Enno Bozdo’ me dy ‘n’ dhe jo me një ‘n’ siç është rezulton aktualisht. Kur partia nuk ruan shkronjat e emrave të udhëheqësve të saj, si mund të ruajë votat nga narkoregjimi dhe të ndalë trenat bullgarë?!
-Çim Peka, kur kërcënon bandat që prekin votat, duhet të kujdeset që të thotë ‘çunat e Durrësit, çunat e Dubait…’, dhe jo ‘qunat e Durrësit, qunat e Dubait…’, pasi kërcënimi e humbet forcën dhe çunat nuk tremben.
-Me vijimin e betejës apo shpalljen e fazës së dytë të revulucionit, zonja Topalli nuk duhet të thotë më ‘z. Byrysha çan malet’, por ‘z. Berisha çan malet’.
-Neni Basha në statut duhet të digjet bashkë me fotot e besprerëve në oborrin e SHQUP. Hiri i mbetur përzihet me sheqer, me të cilin yshten kutitë e votimit para se të hapen në zgjedhjet e ardhshme.
-Bluzat me mesazhin ‘Free Berisha’, mesazh që e ka ezauruar qëllimin, të zëvëndësohen me bluza dhe kapele me foton e Alma Kaçit, për të forcuar moralin e revulucionarëve.
-Spotet me pjatat plot të çunit të Fahriut dhe spotet me ‘bubin kaçurrel’ të çunit të Besnikut duhet të zëvëndësohen me trailerin e filmit aksion të Monikës.
-Selia e partisë duhet ndërruar. SHQUP-i, i cili më parë përdorej për vaki, është vend ters që ndjell vetëm grindje, humbje, zi dhe braktisje. Që kur u zhvendos në SHQUP, PD-ja nuk e ka parë një ditë të bardhë.
