Greqia mbyll bizneset, në ishullin e Mikonos ulen qepenat pas masave të reja kufizuese.
Në ishullin grek te Mikonos, një pikë e famshme turistike, kafenetë, baret dhe restorantet janë detyruar të mbyllin aktivitetin e tyre mesnatën e së shtunës, si rezultat i masave kufizuese për parandalimin e përhapjes së pandemisë.
Mazat janë në fuqi deri të dielën e ardhshme por mund të zgjasin edhe me shumë, arsye që ka çuar në acarimin e pronarëve të bizneseve.
Stavros Grimplas, pronar i një bari në ishull, tha se mbyllja e bizneseve në mesnatë ishte një gabim i madh, pasi shumë njerëz do dyndeshin njëherësh në qytet.
“Nuk mund të merret një vendim i njëanshëm dhe të mbyllet çdo aktivitet në ishull brenda një dite, kur të gjithë kanë ardhur për argëtim, ushqim dhe plazh. Në këtë moment, i kemi gënjyer vizitorët, duke i ftuar të vijnë në Greqi, dhe më pas është mbyllur gjithçka”, tha Stavros Grimplas.
Qeveria greke ka qenë e shqetësuar për numrin e lartë të rasteve të cilat cenojnë suksesin e deritanishëm për ta mbajtur nën kontroll situatën.
Të shtunën, Greqia konfirmonte 230 raste të reja duke e çuar numrin total të të infektuarve në 6 858.
Duke filluar nga dita e hënë kufizime të ngjashme do të vendosen edhe në Athinë dhe zona të tjera.
Kryeministri Kyriakos Mitsotakis dhe autoritete të tjera i kanë bërë thirrje të rinjve të sillen me përgjegjshmëri, duke mbajtur maskat dhe distancimin social.
