Gjatë 24 orëve të fundit në vendin tonë u shënuan 7 viktima si pasojë e koronavirusit. Sipas raportimit të Ministrisë së Shëndetësisë, mes viktimave është edhe një 21-vjeçar.
Abc news raporton se 21-vjeçari, V.B., i lindur në Bulqizë dhe me banim në Durrës, ishte i shtruar prej pak ditësh në spitalin Infektiv, ku edhe ndërroi jetë pasditën e datës 7 janar.
Bëhet me dije se i riu ishte në shtëpi deri më datë 1 janar, ku ka festuar Vitin e Ri në familje, por si pasojë e përkeqësimit të gjendjes shëndetësore, është dërguar urgjentisht në spital. Gjithashtu, mësohet se i riu vuante nga sëmundje të tjera bashkëshoqëruese, të cilat bënë që 21-vjeçari të humbasë betejën me COVID-19.
Ndërkohë, Ministria e Shëndetësisë raportoi se në 24 orët e fundit janë konfirmuar 673 raste pozitive me koronavirus nga 3927 teste të kryera.
