Motra e Armando Sulejmanit, Etleva Elmazi i ka shpëtuar ditën e sotme një atentati me tritol. Mesditën e sotme, rreth orës 12;30, Policia e Vlorës u vu në alarm pasi mori një telefonatë se në makinën e llojit ‘BMW X3”, ishte gjetur një pako e dyshimtë.
Pas këtij alarmi, është rrethuar zona dhe janë bërë verifikimet përkatëse dhe efektivët kanë konstatuar se në makinën e llojit ‘BMW X3’, që është në emër të motrës së Çipurit, ishte vënë eksploziv.
Më pas, makina është transportuar pranë komisariatit të Vlorës dhe forcat xheniere bënë të mundur heqjen e pakos në mënyrën që të mos shkaktohen dëme në njerëz apo materiale. Aktualisht janë sekuestruar edhe kamerate sigurisë së bizneseve në lagjen “Kushtrimi”, ku dhe ishte parkuar mjeti në momentin që iu vu lënda plasëse. Pamjet filmike, mund të çojnë në zbardhjen e ngjarjes.
Burime nga grupi hetimor, bëjnë me dije se Elmazi, është shprehur se në momentin që ka dalë të marrë makinën e saj, para dhomave të paraburgimit në Vlorë, ku edhe e kishte parkuar, ka parë që një person ka dalë nga poshtë mjetit.
Pikërisht kjo gjë, e ka bërë të dyshojë dhe të njoftojë autoritetet, të cilët më pas zbuluan se në makinën e llojit ‘BMW X3”, ihte vënë një sasi tritoli. “Pashë një person që doli nga poshtë makinës. Njoftova policinë se dyshova,”– mësohet të ketë thënë ajo.
Motivi i këtij atentati mendohet të jetë larja e hesapeve dhe të ketë lidhje me të shkuarën e Sulejmanit. Ky i fundit para pak kohësh ka dalë nga burgu. Armando Sulejmani u vu në pranga pasi iu bë atentat, në muajin shkurt të vitit 2019, për armë mbajtje pa leje.
Motra e Sulejmanit, Etleva, rezulton të jetë gjithashtu nëna e Daut Elmazit, i cili është vënë në pranga si bashkëpunëtor në atentatin kundër Inez Hajrullës.
Historia e familjes Sulejmani-Elmazi, ‘fijet’ e ngjarjeve që lidhen me mesazhin që morën sot.
Armando Sulejmani i njohur ndryshe si Çipuri i shpëtoi një atentati një vit më parë në zonën e ujit të Ftohtë në Vlorë. Armando Sulejmani, 42 vjeç, i cili ishte shënjestra e atentatit ndodhej në makinën tip “Passat”, bashkë me kunatin dhe një shokun e tij, Orest Rexho dhe Arjan Hasani. Ata ishin duke hipur në makinë, ndërsa disa persona të maskuar dhe me kallashnikov kanë qëlluar nga një makinë në ecje. Ata kanë qëlluar me breshëri duke lënë të vdekur kunatin dhe shokun e Sulejmanit, dhe duke e plagosur rëndë këtë të fundit.
42-vjeçarit nga Vlora, i është bërë një atentat në muajin maj të vitit 2016, në hyrje të banesës së tij në lagjen “Pavarësia” në Vlorë. Ai u qëllua me 11 plumba, por shpëtoi duke u plagosur vetëm me një plumb në krah
