Maqedonia e Veriut me shifra të larta, 6 viktima dhe 129 raste të reja me COVID-19 në 24 orët e fundit.
Gjashtë të vdekur, 129 të infektuar dhe 109 të shëruar është bilanci i ditës së premte me sëmundjen që e shkakton koronavirusi, COVID-19, në Maqedoninë e Veriut.
Pesë nga pacientët e vdekur janë nga Shkupi dhe një nga Struga.
Me këto shifra, numri i përgjithshëm i viktimave nga koronavirusi në Maqedoninë e Veriut arrin në 451, ndërsa numri më i madh i tyre është në Shkup: 185; Tetovë: 71; Kumanovë: 48; Strugë: 42.
Sa u përket rasteve të reja, të regjistruara të premten, më shumë të prekur ka në Shkup: 45 raste; në Shtip: 25, ndërsa numër më i vogël i të infektuarve u regjistrua në 14 qytete tjera.
Të dhënat e Ministrisë së Shëndetësisë për rastet e reja i referohen testimit të 1,535 mostrave.
Maqedonia e Veriut ka konfirmuar gjithsej 9,797 të infektuar me koronavirus, prej të cilëve 4,092 raste mbeten aktive.
Të premten u regjistruan edhe 109 të shëruar, që e çojnë në 5,254 numrin e përgjithshëm të atyre që e kanë fituar betejën me COVID-19.
Ministri i Shëndetësisë i Maqedonisë së Veriut, Venko Filipçe, përsëriti se gjendja me koronavirus është e qëndrueshme dhe se institucionet shëndetësore kanë kapacitete të mjaftueshme për t’u përballur me të.
Ai po ashtu bëri thirrje për respektimin e masave mbrojtëse, ndërsa paralajmëroi se gjatë fundjavës, Komisioni i Sëmundjeve Infektive do të diskutojë mundësinë e heqjes së masave kufizuese në kufijtë e vendit, respektivisht heqjen e testit për koronavirus, të njohur si PCR, me shtetet e rajonit: Kosovën, Serbinë, Bosnjën dhe Malin e Zi.
